So‘nggi yillarda “superfud” atamasi ayniqsa mashhur bo‘lib, u ozuqaviy moddalar konsentratsiyasi yuqori bo‘lgan oziq-ovqatlarni tavsiflaydi. “Superfud” nima ekanligi to‘g‘risida aniq taʼrif yo‘q. Umuman olganda superfudlarga ozuqaviy jihatdan boy deb hisoblanadigan mahsulotlar sabzavotlar, mevalar barcha donli mahsulotlar, dukkaklilar va yong‘oqlar kiradi.
Superfudlar — bu ayniqsa foydali moddalar, vitaminlar, minerallar, antioksidantlar va boshqa biologik faol birikmalarga boy deb hisoblanadigan oziq-ovqat mahsulotlaridir. Ular sog‘liqni yaxshilashga, kasalliklar paydo bo‘lish ehtimolini kamaytirishga va umumiy ruhiy holatni yaxshilashga hissa qo‘shadi. Qizig‘i shundaki, o‘tgan asrning boshlarida superfood sifatida banan, aniqrog‘i turli xil mikroorganizmlardan himoya qiluvchi uning qobig‘i superfud deb hisoblangan.
Chia urug‘ining foydalari
Hozirgi kunda chia urug‘i eng mashhur superfudlardan biriga aylandi va bu tasodif emas albatta. Uning boy tarkibi deyarli barcha omega yog‘ kislotalari 3, 6 va 9 ni o‘z ichiga oladi va bu chia urug‘ini foydali moddalarning haqiqiy xazinasiga aylantiradi. Bu urug‘ yallig‘lanishni oldini oladi, gormonal muvozanatni tiklashga yordam beradi, shuningdek, tomirlarning ichki devorlarini sog‘lom shakllantirishga hissa qo‘shadi.
Qovoq urug‘ining foydalari
Qovoq urug‘i uyqusizlik bilan kurashishga va uyquning sifatini yaxshilashga yordam beradi. Buning sababi tarkibida triptofan — serotonin va melatonin ishlab chiqarishga hissa qo‘shadigan aminokislota mavjudligidadir. Ushbu gormonlar uyquga javobgar bo‘lib, ular tanani bo‘shashishiga va tungi dam olishga tayyorlashga yordam beradi.
Qovoq urug‘i tarkibida sink — viruslar va bakteriyalarga qarshi tabiiy antibakterial vosita mavjud. Shuning uchun ular immunitet tizimini qo‘llab-quvvatlash va infeksiyalar rivojlanishining oldini olish uchun ishlatiladi. Qovoq urug‘ida mavjud bo‘lgan tolalar oshqozon-ichak traktining yaxshi ishlashini normallashtirishga hissa qo‘shadi.
Spirulinaning foydalari
Spirulina ilmiy jihatdan Spirulina platensis nomi bilan tanilgan ko‘k-yashil mikrosuvo‘tidir. Ozuqa moddalarining tarkibi bo‘yicha u o‘simlik va hayvonot manbalaridan boshqa ko‘plab oziq-ovqat mahsulotlaridan ustun hisoblanadi.
Birinchidan, spirulina organizmda tez va uzoq muddatli to‘yinganlikni taʼminlaydi, bu esa organizmga zarar bermasdan ovqat miqdorini sezilarli darajada kamaytirishga imkon beradi. Ushbu suv o‘tini muntazam isteʼmol qilish tanaga barcha zarur elementlarning optimal o‘zlashtirilishiga hissa qo‘shadi. Bundan tashqari, spirulina organizmdagi metabolik jarayonlarni faollashtiradi, bu ayniqsa kam harakatlanuvchi turmush tarziga ega odamlar uchun foydalidir. U metabolizmni tezlashtirishga va kun bo‘yi yuqori energiya darajasini saqlab turishga yordam beradi. Bugungi tez surʼatlik hayot tarzida, faollik o‘rnini ko‘pincha harakatsiz turmush tarzi egallab olgan bir paytda, spirulina hayotiylikni saqlash uchun ideal yechimdir.
Spirulinaning foydali xususiyatlari — bu suv o‘tini kunlik ratsionga qo‘shish haqida o‘ylash uchun yana bir muhim sababdir. Spirulina tarkibidagi antioksidantlar hujayralarga erkin radikallar, tabiiy ravishda hosil bo‘ladigan yoki oziq-ovqat va ifloslangan havodan kelib chiqadigan kimyoviy zararlanishning oldini oladi.
Organizmdagi erkin radikallar miqdori meʼyordan oshganda, oksidlovchi stress deb ataladigan holat paydo bo‘ladi. U revmatoid artrit, astma va turli xil yurak-qon tomir kasalliklari kabi bir qator patologiyalarni keltirib chiqarishi mumkin. Erkin radikallarni zararsizlantiradigan va shu bilan oksidlovchi stressning paydo bo‘lishiga to‘sqinlik qiladigan moddalar esa aynan spirulinada mavjud.
Shuningdek spiriluna tarkibida B guruhi vitaminlari mavjudligi tufayli stress, uyqusizlik va havotirlilik kabi psixo-emotsional kasalliklarning samarali profilaktikasi hisoblanadi.
Kunjut pastasining foydalari
Kunjut urug‘idan tayyorlangan pasta tahini deb ataladi. U kremsimon tuzilishga va yengil achchiqlik bilan boy yong‘oq taʼmiga ega. Uning foydasini zararli kaloriyalarga to‘la va ozuqaviy moddalardan mahrum bo‘lgan ko‘plab souslar bilan solishtirish qiyin. Kunjut pastasi foydali elementlarga jumladan, ko‘p to‘yinmagan yog‘ kislotalari, shuningdek, oqsil, kaliy, marganets, kaltsiy va temir kabi mikroelementlarga boy.
Tahini gormonal muvozanatni uyg‘unlashtirishga, temirning so‘rilishi va terining ko‘rinishini yaxshilashga yordam beradi. Shuningdek, pasta suyaklarning mineral zichligi va mushaklarning mustahkamligiga ijobiy taʼsir ko‘rsatadi. Uning antioksidantlik taʼsiri erkin radikallar tomonidan kelib chiqqan hujayralarning shikastlanishini oldini olishga yordam beradi.
Braziliya yong‘oqlari foydasi
Ozuqaviy qiymatiga qaramay, Braziliya yong‘oqlarini ehtiyotkorlik bilan isteʼmol qilinishi kerak. Uning selen konsentratsiyasi yuqori bo‘lganligi sababli, dozani oshirib yuborish xavfini oldini olish uchun kuniga uchtadan ko‘p yong‘oq isteʼmol qilish tavsiya etilmaydi.
Inson organizmiga normal ishlashi uchun ko‘p to‘yinmagan yog‘ kislotalari kerak. Braziliya yong‘oqlari foydali moddalar xazinasi bo‘lib, uning tarkibining uchdan bir qismidan ko‘prog‘ini ko‘p to‘yinmagan yog‘ kislotalari tashkil etadi. Ular qondagi xolesterin miqdorini pasaytiradi va yurak-qon tomir kasalliklari va insult xavfini kamaytiradi.
Izoh (0)