O‘zbekiston prezidenti Shavkat Mirziyoyev 24-iyul kuni 67 yoshni qarshi oldi. Prezident matbuot kotibi shu munosabat bilan davlat rahbariga yo‘llangan tabrik maktublarini e’lon qildi.
O‘zbekiston yetakchisiga xorijiy davlatlar, hukumatlar va parlamentlar, nufuzli xalqaro va mintaqaviy tashkilotlar rahbarlaridan qutlovlar kelgan. Maktublarda Shavkat Mirziyoyev rahbarligida O‘zbekiston davlatchilikni mustahkamlash, xalq farovonligini yuksaltirish va mamlakatning xalqaro maydondagi nufuzini oshirish yo‘lida ulkan yutuqlarga erishayotgani ta’kidlangan.
Shuningdek, prezidentga mustahkam sog‘lik, uzoq umr va muvaffaqiyatlar, O‘zbekiston xalqiga esa tinchlik-osoyishtalik va farovonlik tilaklari, o‘zaro manfaatli hamkorlikni yanada mustahkamlashga qat’iy intilish bildirilgan.
Quyida Shavkat Mirziyoyevga yo‘llangan tabrik maktublaridan parchalar keltirildi.
Rossiya prezidenti Vladimir Putin
“Prezidentlik faoliyatingiz bilan yurtdoshlaringiz o‘rtasida katta hurmat va yuksak xalqaro obro‘-e’tiborga sazovor bo‘ldingiz. Sizning rahbarligingizda O‘zbekiston ijtimoiy va iqtisodiy sohalarda salmoqli yutuqlarga erishdi, jahon maydonida o‘z mavqeyini mustahkamladi.
Davlatlarimiz o‘rtasidagi strategik sheriklik va ittifoqchilik munosabatlarini, barcha yo‘nalishlarda samarali ikki tomonlama hamkorlikni rivojlantirishga qo‘shgan shaxsiy hissangiz beqiyosdir.
Sizga chin dildan mustahkam sog‘liq, baxt-saodat, farovonlik va muvaffaqiyatlar tilayman”.
Xitoy raisi Si Szinpin
“Xitoy-O‘zbekiston munosabatlarini rivojlantirishga alohida e’tibor qarataman va Siz bilan mustahkam do‘stligimizni qadrlayman. Siz bilan birgalikda barcha sohalarda hamkorlikni rivojlantirish va Xitoy—O‘zbekiston munosabatlarini yangi bosqichga olib chiqish bo‘yicha sa’y-harakatlarga tayyorman. Ishonchim komil, Sizning rahbarligingizda ‘O‘zbekiston — 2030’ strategiyasida belgilangan barcha maqsadlar, albatta, o‘z vaqtida amalga oshiriladi”.
Qozog‘iston prezidenti Qosim-Jo‘mart To‘qayev
“Sizning bunyodkorona siyosatingiz va oqilona rahbarligingiz tufayli bugun Siz xalqingizning umume’tirof etilgan yetakchisi bo‘lib, xalqaro hamjamiyatda haqli ravishda katta obro‘-e’tiborga egasiz.
Ishonchim komil, Sizning strategik yo‘lingizga qat’iy amal qilib, muhim tashabbus va islohotlarni muvaffaqiyatli amalga oshirib, qardosh o‘zbek xalqi farovon Yangi O‘zbekistonni barpo etishda Siz qo‘ygan yuksak maqsadlarga erishadi”.
Qirg‘iziston prezidenti Sadir Japarov
“Siz bilan samimiy va ishonchli shaxsiy munosabatlarimiz bundan buyon ham mamlakatlarimiz o‘rtasidagi ikki tomonlama hamkorlikni rivojlantirish omili bo‘lib qoladi.
Mamlakatlarimiz o‘rtasidagi har tomonlama strategik sheriklikni do‘stlik va yaxshi qo‘shnichilik ruhida rivojlantirish masalalariga shaxsan e’tiboringizni yuksak qadrlayman.
Hurmatli Shavkat Miromonovich, Sizning timsolingizda hamfikr, sadoqatli va yaqin do‘stimni topganimdan juda xursandman”.
Tojikiston prezidenti Emomali Rahmon
“Tavallud kuningiz munosabati bilan eng samimiy tabriklarim va eng ezgu tilaklarimni qabul qilishingizni so‘rayman. Sizning O‘zbekiston Respublikasi prezidenti lavozimidagi samarali faoliyatingiz va O‘zbekiston xalqiga fidokorona xizmatingiz mamlakatingizda ham, uning tashqarisida ham munosib obro‘-e’tibor va hurmatga sazovor bo‘ldi.
Biz Sizning uzoqni ko‘zlagan rahbarligingizda qardosh O‘zbekistonning ijtimoiy-iqtisodiy taraqqiyot va xalqaro maydondagi nufuzini izchil mustahkamlash yo‘lidagi keng ko‘lamli yutuqlaridan chin dildan mamnunmiz”.
Turkmaniston prezidenti Serdar Berdimuhamedov
“Biz mamlakatlarimiz o‘rtasidagi vaqt sinovidan o‘tgan siyosiy, savdo-iqtisodiy va madaniy-gumanitar aloqalarni bundan buyon ham kengaytirish niyatidamiz. Birgalikdagi sa’y-harakatlar bilan Turkmaniston-O‘zbekiston davlatlararo munosabatlari va strategik sherikligi bundan buyon ham qardosh xalqlarimiz farovonligi yo‘lida izchil rivojlanib borishiga qat’iy ishonamiz.
Fursatdan foydalanib, Sizga chin qalbimdan mustahkam sog‘lik, baxt-saodat, oilaviy farovonlik va davlatchilik faoliyatingizda yangi muvaffaqiyatlar, qardosh O‘zbekiston xalqiga esa tinchlik-osoyishtalik, taraqqiyot va ravnaq tilayman”.
Turkman xalqining milliy yetakchisi Gurbanguli Berdimuhamedov
“Tavallud kuningiz munosabati bilan samimiy tabriklarim va eng ezgu tilaklarimni qabul qilgaysiz.
Sizning qardosh O‘zbekiston Respublikasi ravnaqi va xalq farovonligi yo‘lidagi sa’y-harakatlaringiz va tinimsiz mehnatingiz haqiqiy vatanparvarlik va o‘z Vataniga fidokorona xizmat qilishning yorqin namunasidir.
Mamlakatlarimiz o‘rtasidagi strategik sheriklik va yaxshi qo‘shnichilik munosabatlarini rivojlantirishga shaxsan e’tiboringizni alohida qayd etmoqchiman. Samimiy do‘stlik va o‘zaro anglashuvni mustahkamlashga qo‘shayotgan ulkan hissangiz uchun Sizga samimiy minnatdorlik bildiraman”.
Ozarbayjon prezidenti Ilhom Aliyev
-fh7QDrWA.jpg)
“Qadrli Shavkat Miromonovich, aziz og‘am! Sizni tavallud kuningiz bilan chin qalbimdan tabriklab, mustahkam sog‘lik, uzoq umr, baxt-saodat, muvaffaqiyatlar va qardosh O‘zbekiston davlati va xalqining farovonligi va ravnaqi yo‘lidagi faoliyatingizda tuganmas kuch-g‘ayrat tilayman.
Muhtaram Shavkat Miromonovich, men shaxsiy munosabatlarimizni, do‘stligimizni, bir-birimizga bo‘lgan chuqur hurmat va ehtiromimizni hamisha qadrlayman, o‘zaro ishonch va qo‘llab-quvvatlashga asoslangan birgalikdagi ishlarimizdan, doimiy aloqalarimizdan mamnunman.
Ushbu qutlug‘ ayyomda Sizni yana bir bor chin qalbimdan tabriklab, eng ezgu tilaklarimni izhor etaman”.
Belarus prezidenti Aleksandr Lukashenko
“Hurmatli Shavkat Miromonovich, Sizga va yaqinlaringizga tinchlik-osoyishtalik, oilangiz va do‘stlaringiz Sizga tayanch bo‘lishini, xizmatiga butun umringizni bag‘ishlagan O‘zbekistonga esa farovonlik va ravnaq tilayman. Sizni mehmondo‘st Belarus zaminida qutlashdan mamnun bo‘laman”.
Turkiya prezidenti Rajab Toyyib Erdo‘g‘on
Prezident janoblari, qadrli birodarim! Tavallud kuningiz bilan chin qalbimdan muborakbod etib, Siz Janobi Oliylariga yaqinlaringiz bilan birgalikda sihat-salomatlik va osoyishtalikka to‘la uzoq umr tilayman.
Mushtarak tariximiz va chuqur ildiz otgan rishtalarimizdan kuch oluvchi munosabatlarimiz Siz Janobi Oliylarining ulkan hissasi tufayli ikki va ko‘p tomonlama shakllarda, jumladan, Turkiy davlatlar tashkiloti doirasida ham jadal rivojlanayotgani bizga cheksiz quvonch bag‘ishlaydi.
O‘tgan oy Siz bilan birgalikda o‘tkazgan Turkiya-O‘zbekiston Oliy darajadagi strategik hamkorlik kengashining III yig‘ilishi asnosida yurtimizga amalga oshirgan tashrifingizdan bag‘oyat mamnun bo‘ldim. Do‘stlik va birodarlikka tayangan yaqin munosabatlarimiz kelgusida ham barqaror ravishda mustahkamlanishda davom etishiga bo‘lgan ishonchimni yana bir bora ta’kidlashni istardim”.
Mo‘g‘uliston prezidenti Uxnaagiyn Xurelsux
“Sizni tavallud kuningiz bilan chin qalbimdan samimiy muborakbod etaman.
Men rafiqam bilan birga Sizning go‘zal mamlakatingizga – ulug‘vor tog‘lar va zilol suvli daryolar yurtiga davlat tashrifini amalga oshirganimdan, Siz prezident janobi oliylari va Ziroatxon Mirziyoyeva janobi oliyalari bilan samimiy muloqotdan g‘oyat mamnunman, bu ikki mamlakat o‘rtasidagi tarixiy, an’anaviy va do‘stona munosabatlarni yanada mustahkamlashga xizmat qildi.
Muhtaram Prezident janoblari, Siz va rafiqangizni boy tariximiz, betakror madaniyatimiz va ko‘chmanchi xalqimiz beshigi bo‘lgan go‘zal yurtimizga o‘zingizga qulay vaqtda davlat tashrifi bilan kelishga yana bir bor taklif etishdan g‘oyat mamnunman”.
Janubiy Koreya prezidenti Yun Sok Yol
-UKLlWrV9.jpg)
“O‘tgan oyda amalga oshirgan davlat tashrifim tufayli Siz bilan birgalikda do‘stligimizni mustahkamlaganimiz, shuningdek, Koreya Respublikasining Markaziy Osiyodagi yagona alohida strategik sherigi bo‘lgan O‘zbekiston Respublikasi bilan strategik munosabatlarni chuqurlashtirganimizdan bag‘oyat mamnunman.
Bundan buyon ham Koreya-O‘zbekiston munosabatlari rivojlanib, kelajakka yo‘naltirilgan o‘zaro manfaatli hamkorlik yanada kengayishiga Siz doimiy e’tibor qaratasiz va qo‘llab-quvvatlaysiz, deb umid qilaman.
Sizga mustahkam sog‘lik va baxt-saodat, O‘zbekiston Respublikasiga esa abadiy farovonlik tilayman”.
Shuningdek,Vengriya bosh vaziri Viktor Orban, Yevropa tiklanish va taraqqiyot banki prezidenti Odil Reno-Basso, Osiyo infratuzilmaviy investitsiyalar banki prezidenti Szin Lisyun ham tabrik maktublari yo‘lladi. O‘zbekiston prezidenti tavallud kuni munosabati bilan xorijiy davlatlar, hukumatlar va parlamentlar, nufuzli xalqaro va mintaqaviy tashkilotlar rahbarlaridan qutlovlar kelishi davom etmoqda.
Shavkat Mirziyoyev haqida
Shavkat Mirziyoyev 1957-yil 24-iyulda Jizzax viloyatining Zomin tumanida shifokor oilasida tug‘ilgan. 1981-yili Toshkent irrigatsiya va qishloq xo‘jaligini mexanizatsiyalash muhandislari institutini tugatgan.
U 2003-yilda O‘zbekiston bosh vaziri etib tasdiqlanib, 2016-yilga qadar faoliyat yuritgan. 2016-yil 4-dekabr kuni bo‘lib o‘tgan prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktyabr kuni bo‘lib o‘tgan prezident saylovida 80,1 foiz ovoz bilan O‘zbekiston prezidenti etib qayta saylangan. “Mehnat shuhrati” va “Fidokorona xizmatlari uchun” ordenlari bilan taqdirlangan.
Izoh (0)