Ko‘pchilik ichak holatiga faqat oshqozon og‘rig‘i yoki qabziyat bo‘lsa, e’tibor qaratadi. Ammo ichaklar organizmning eng muhim organlaridan biri bo‘lib, ularning faoliyatidagi buzilishlar ko‘p hollarda yashirin belgilar bilan namoyon bo‘ladi. Agar ularga o‘z vaqtida e’tibor qilinmasa, salomatlik bilan bog‘liq jiddiy muammolar yuzaga kelishi mumkin. Quyida ichaklar faoliyatidagi buzilishlardan darak beradigan 6 ta yashirin omillar haqida so‘z yuritamiz.
Odatdagidan ko‘ra asabiyroq bo‘lish
Ko‘pchiligimiz qo‘rquv yoki xavotir tufayli qornimizda g‘alati g‘uvurlash yoki og‘riqni his qilganmiz. Ammo tibbiyot fanlari doktori, gastroenterolog Aditya Shrinivasan ta’kidlashicha, bu holat teskari yo‘nalishda ham ishlashi mumkin: ichak miyaga “menda muammo bor” degan signalni yuboradi.
“Bu jarayon asab hujayralari — butun tana bo‘ylab signallarni uzatadigan neyronlar orqali sodir bo‘ladi. Aslida, ovqat hazm qilish tizimida neyronlar soni miya hujayralaridan ham ko‘p. Shuning uchun ichakdagi muammolar kayfiyatning o‘zgarishi, asabiylik va xavotirni keltirib chiqarishi mumkin”, deydi mutaxassis.
Sababsiz charchoq va holsizlik
Tinmay esnash, kech bo‘lmasidan uyqu kelishi, ish faoliyati samaradorligining pasayishi kabi holatlarga ichaklardagi muammolar sababchi bo‘lishi mumkin. Doktor Shrinivasan buni quyidagicha tushuntiradi:
“Agar ichaklarda kerakli miqdorda zarur bo‘lgan oziq moddalarni to‘liq singdira olmasa, bu energiya darajasiga ta’sir qiladi. Bu diqqatni jamlay olmaslik, xotira bilan bog‘liq muammolar va surunkali charchoqqa olib kelishi mumkin. Ammo barchasini ichakka to‘nkamasdan oldin uyqu rejimini ham tekshirib ko‘rish kerak”, deydi Aditya.
Bosh og‘rig‘i doimiy bezovta qilsa
“Bugungi kunga kelib bir nechta tadqiqotlar migrenning ayrim ichak kasalliklari — xelikobakterioz va seliakiya sindromi bilan bog‘liqligini ko‘rsatgan. Agar bosh og‘rig‘i ichakdagi turli noqulayliklar fonida davom etsa, gastroenterologga murojaat qiling”, deydi doktor Shrinivasan.
Og‘iz bo‘shlig‘idan yoqimsiz hid kelishi
Ichakdagi muammolarning yana bir kutilmagan belgisi bu og‘izdan keladigan yoqimsiz hiddir. Bu nima uchun yuz beradi: doimiy qabziyat organizmda toksinlar to‘planishiga olib keladi, bu esa nafasning o‘tkirligiga ta’sir qiladi.
“Agar tishingizni muntazam tozalab, og‘iz gigiyenasiga amal qilayotgan bo‘lsangiz, biroq baribir yalpizli saqich yoki konfetga ehtiyoj sezsangiz, bu haqida shifokorga ayting”, deydi diyetolog Joanna Salazar.
Yuz terisi va butun tanada turli toshmalar paydo bo‘lishi
Teri organizmdagi ichki holatni aks ettiradi, bu ilmiy tadqiqotlar bilan ham tasdiqlangan: ichak kasalliklari akne, ekzema va psoriaz bilan bog‘liq ekani aniqlangan.
Tez-tez kasal bo‘lish
Immunitet tizimining taxminan 70 foizi ichakda joylashgan. Ichak mikrobiomi organizmning virusli infeksiyalarga, vaksinalarga va dori vositalariga qanday javob berishini belgilaydi. Shu sababli ichaklari kasal bo‘lgan odamning immunitetini oshirish mushkul.
Izoh (0)