Amerikalik o‘smir bola yurak-qon tomir tizimidagi kasalliklarni bir necha soniyada aniqlaydigan, sun’iy intellekt asosida ishlovchi maxsus ilovani yaratdi. Bu haqda Oddity Central nashri xabar berdi.
Dallas shahrida yashovchi Siddxartx Nandyala ismli bola tomonidan ishlab chiqilgan ushbu innovatsion ilova yurak faoliyatiga oid nosozliklarni yetti soniya ichida aniqlay oladi. Manbalarga ko‘ra, dastur hozirga qadar AQSHda 15 mingdan ortiq, Hindistonda esa 700 ga yaqin bemorda sinovdan o‘tgan bo‘lib, 96 foiz aniqlik bilan tashxis qo‘ygan.
Siddxartx sun’iy intellekt sohasida Oracle va ARM kabi yirik kompaniyalar tomonidan sertifikatlangan eng yosh mutaxassis sifatida e’tirof etilgan. Uning ishlab chiqqan texnologiyasi Hindistonning Guntur shahridagi davlat kasalxonasida sinovdan o‘tkazilib, yuqori samaradorlik ko‘rsatgan.
Haydarobod shahrida bo‘lib o‘tgan Sun’iy intellekt bo‘yicha global sammitda yosh ixtirochi Circadian AI dasturini aynan tibbiy xizmatlardan cheklangan hududlardagi insonlarga tezkor yordam ko‘rsatish uchun ishlab chiqqanini alohida ta’kidladi.
Hindistonning Andhra Pradesh shtati bosh vaziri Siddxartx bilan uchrashuvda uning salohiyatini yuqori baholab, keyingi loyihalarini qo‘llab-quvvatlashini bildirgan. Yosh bo‘lishiga qaramasdan, Siddxartx o‘rta maktabni allaqachon tamomlab, hozirda Dallas universitetida kompyuter fanlari yo‘nalishida tahsil olmoqda.
Izoh (0)