Qozog‘iston milliy iqtisodiyot vaziri Serik Jumangarin yuqori daromadli fuqarolar uchun oshirilgan daromad solig‘i joriy etishni taklif qildi. Bu haqda Tengrinews xabar berdi.
Gap yillik daromadi 8 500 oylik hisob-kitob ko‘rsatkichidan oshadiganlar haqida ketmoqda, bu 33 million 422 ming tengeni (65 ming dollardan ortiq) tashkil etadi.
Yillik daromadi 8 500 oylik hisob-kitob ko‘rsatkichidan yuqori bo‘lgan xodimlar uchun 15 foizlik oshirilgan stavkani belgilash taklif qilinmoqda. Bu yuqori daromad topadiganlarga qo‘shimcha soliq solinadigan mexanizmni yaratishga imkon beradi, dedi Jumangarin Soliq kodeksi loyihasi muhokamasida.
Davlat qimmatli qog‘ozlari bo‘yicha daromadlarga 10 foiz miqdoridagi korporativ daromad solig‘i stavkasi qo‘llaniladi. Hozirda ular soliqdan ozod etilgan.
Shuningdek, kvazidavlat sektorining qimmatli qog‘ozlari bo‘yicha daromadlarni soliqqa tortish taklif etilmoqda. Bunda iqtisodiyotning real sektorini qo‘llab-quvvatlash va infratuzilma loyihalariga investitsiyalarni jalb qilish uchun “Bayterek” xoldingining qimmatli qog‘ozlaridan olingan daromadlarni 2030-yilgacha soliqdan ozod qilish taklif etilmoqda. Bu har yili iqtisodiyotga 10 trillion tenge miqdorida moliyaviy mablag‘ kiritish imkonini beradi, deya qo‘shimcha qildi vazir.
Qozog‘istonda qo‘shimcha qiymat solig‘i (QQS) bo‘yicha chegara va soliq stavkasi belgilangan. Hukumat va deputatlar bu masalada murosaga kelishgan.
QQS 16 foizga teng bo‘ladi (hozir u 12 foiz). QQS bo‘yicha chegara 40 million tenge (salkam 48 ming dollar) miqdorida belgilansin. Bu biz erishgan murosa mevasidir. Lekin shuni aytmoqchimanki, biz shu asnoda 160 mingta yangi soliq to‘lovchini yo‘qotyapmiz va qayerdadir 400 milliard qo‘shimcha tushumni ololmayapmiz, dedi Jumangarin.
Izoh (0)