Wildberries (“RVB” MCHJ Rossiya rezidenti) marketpleysining O‘zbekistondagi faoliyati soliq qonunchiligidagi ayrim talablarga mos kelmasligi aniqlandi, deb xabar bermoqda Soliq qo‘mitasi matbuot xizmati.
Qayd etilishicha, Wildberries O‘zbekistonda WB Int Export MCHJ shaklida yuridik shaxs tashkil etib faoliyatini amalga oshirib kelmoqda. Tashkilotda soliq auditi o‘tkazilib, 2022—2024-yillar uchun byudjetga qo‘shimcha hisoblangan 51,2 milliard so‘m (shundan, 42,8 milliard so‘m QQS) soliq to‘lovlari to‘landi.
Soliq qo‘mitasi barcha soliq to‘lovchilarga yagona va obyektiv yondashuvni qo‘llab-quvvatlab, soliq majburiyatlarini bajarish uchun teng sharoitlarni yaratishga amal qiladi. Faoliyatni O‘zbekiston qonunchiligi talablariga to‘liq rioya qilgan holda amalga oshirish soliq organlari bilan o‘zaro ochiq munosabatlarni ta’minlaydi hamda e’tirozlar bildirish uchun asoslarni istisno qiladi, deyiladi xabarda.
Qo‘mita elektron tijorat faoliyatini amalga oshirayotgan subyektlar faoliyatini legallashtirish bo‘yicha tizimli ishlar davom ettirilishini bildirdi.
Wildberries yirik xalqaro onlayn riteyleri O‘zbekistonda o‘z faoliyatini 2022-yilda yo‘lga qo‘ygandi. Wildberries ayollar, erkaklar va bolalar kiyimlari, oyoq-kiyimlar va aksessuarlar, kitoblar, zoomahsulotlar, texnika buyumlari va boshqa maishiy tovarlar kabi Rossiya hamda xalqaro brendlardan qariyb 20 milliondan ziyod tovarlarini O‘zbekiston aholisiga taqdim etmoqda.
Wildberries bugungi kunda dunyoning 20 ta mamlakatida, shu jumladan, Rossiya, Qozog‘iston, Belarus, Germaniya, Fransiya, Buyuk Britaniya, Boltiqbo‘yi mamlakatlari, AQSH va boshqa ko‘plab mamlakatlarda o‘z faoliyatini olib bormoqda.
Bundan avval 2025-yil 20-martdan boshlab O‘zbekistonda Temu platformasidan foydalanish cheklanishi haqida xabar berilgan edi. Ushbu elektron savdo platformasi O‘zbekistonning elektron tijorat, chakana savdo, reklama, shaxsiy ma’lumotlarni himoya qilish, iste’molchilar huquqlarini himoya qilish, mualliflik huquqi va turdosh huquqlar sohasidagi qonun hujjatlari talablariga rioya etmayotgani aniqlangan.
Izoh (0)