Қозоғистон миллий иқтисодиёт вазири Серик Жумангарин юқори даромадли фуқаролар учун оширилган даромад солиғи жорий этишни таклиф қилди. Бу ҳақда Tengrinews хабар берди.
Гап йиллик даромади 8 500 ойлик ҳисоб-китоб кўрсаткичидан ошадиганлар ҳақида кетмоқда, бу 33 миллион 422 минг тенгени (65 минг доллардан ортиқ) ташкил этади.
Йиллик даромади 8 500 ойлик ҳисоб-китоб кўрсаткичидан юқори бўлган ходимлар учун 15 фоизлик оширилган ставкани белгилаш таклиф қилинмоқда. Бу юқори даромад топадиганларга қўшимча солиқ солинадиган механизмни яратишга имкон беради, деди Жумангарин Солиқ кодекси лойиҳаси муҳокамасида.
Давлат қимматли қоғозлари бўйича даромадларга 10 фоиз миқдоридаги корпоратив даромад солиғи ставкаси қўлланилади. Ҳозирда улар солиқдан озод этилган.
Шунингдек, квазидавлат секторининг қимматли қоғозлари бўйича даромадларни солиққа тортиш таклиф этилмоқда. Бунда иқтисодиётнинг реал секторини қўллаб-қувватлаш ва инфратузилма лойиҳаларига инвестицияларни жалб қилиш учун “Байтерек” холдингининг қимматли қоғозларидан олинган даромадларни 2030 йилгача солиқдан озод қилиш таклиф этилмоқда. Бу ҳар йили иқтисодиётга 10 триллион тенге миқдорида молиявий маблағ киритиш имконини беради, дея қўшимча қилди вазир.
Қозоғистонда қўшимча қиймат солиғи (ҚҚС) бўйича чегара ва солиқ ставкаси белгиланган. Ҳукумат ва депутатлар бу масалада муросага келишган.
ҚҚС 16 фоизга тенг бўлади (ҳозир у 12 фоиз). ҚҚС бўйича чегара 40 миллион тенге (салкам 48 минг доллар) миқдорида белгилансин. Бу биз эришган муроса мевасидир. Лекин шуни айтмоқчиманки, биз шу аснода 160 мингта янги солиқ тўловчини йўқотяпмиз ва қаердадир 400 миллиард қўшимча тушумни ололмаяпмиз, деди Жумангарин.
Изоҳ (0)