Qozog‘istonda deputat Azat Peruashev mamlakatning o‘z kriptobankini tashkil etishni taklif qildi. Bu haqda Tengrinews xabar berdi.
Deputat bosh vazir nomiga yuborgan so‘rovida prezidentning “raqamli aktivlar sohasini liberallashtirish bo‘yicha shoshilinch choralar ko‘rish zarurligi” to‘g‘risidagi topshirig‘ini eslatdi.
Peruashev so‘nggi yillarda kriptovalyuta global moliya tizimining ajralmas qismiga aylanganini aytdi. U tobora ko‘proq qozog‘istonliklar raqamli valyutalarga qiziqish bildirayotgani, ularga investitsiya vositasi sifatida qarayotganini ta’kidladi.
Ammo mamlakatda bunday aktivlardan qonuniy foydalanish uchun huquqiy infratuzilma yo‘q. Buning o‘rniga kriptovalyutalar aylanishiga taqiq qo‘yilmoqda, bu esa kripto bozorining davlat tomonidan tartibga solinmasligiga, raqamli kapitallarni noqonuniy aylantirish va yashirin iqtisodiyot uchun foydalanishga olib keladi. Ba’zi ma’lumotlarga ko‘ra, Qozog‘istonda kriptovalyutalar bilan operatsiyalarning 90 foizi qonun doirasidan tashqarida amalga oshiriladi, dedi Peruashev.
Unga ko‘ra, kriptovalyutadan foydalanishga qo‘yilgan taqiq yashirin bozorning o‘sishiga, noqonuniy ayirboshlash va kulrang sxemalarning paydo bo‘lishiga, soliq to‘lashdan bo‘yin tovlashga va noqonuniy faoliyatni moliyalashtirishga olib kelgan.
Bundan tashqari, Peruashev qozog‘istonliklar kriptofurushlar, noqonuniy platformalar, moliyaviy piramidalar va firibgarlik loyihalari tufayli katta mablag‘ yo‘qotayotganini aytdi. Milliardlab kriptovalyutalar noqonuniy ravishda chet elga olib chiqib ketilmoqda va davlat bu operatsiyalarni nazorat qilmaydi.
Prezident topshirig‘ini inobatga olgan holda, sohani samarali tartibga solish vositasi sifatida kriptobank tashkil etish mumkin. Bu muassasa raqamli aktivlarni qonuniy doirada nazorat qilish, ayirboshlash va saqlash vazifalarini o‘z zimmasiga oladi. Bunday institutlar rivojlangan iqtisodiyotlarda taraqqiy topgan. U yerlarda raqamli aktivlar qonuniy muomalada ishtirok etadi va texnologik jihatdan ilg‘or fintech sohasining muhim qismini tashkil qiladi, deya ta’kidladi deputat.
Peruashevning fikricha, bunday institutning paydo bo‘lishi Qozog‘istonning ushbu vositalarni muvaffaqiyatli o‘zlashtirayotgan qo‘shni davlatlar fonida yetakchilik pozitsiyasini mustahkamlashi mumkin.
Bu mamlakatimizning raqamli moliyaviy texnologiyalarning mintaqaviy markazi sifatidagi o‘rnini mustahkamlaydi, raqamli aktivlarning noqonuniy aylanmasini kamaytiradi va soliq tushumlarini oshirishga xizmat qiladi, deya ta’kidladi majlis a’zosi.
Shuningdek, deputat Yekaterina Smishlyayeva ham bosh vazirga shunday so‘rov bilan murojaat qildi. U Qozog‘istonda raqamli aktivlarni tartibga solish tizimini qayta ko‘rib chiqishni taklif etdi. Ushbu sohani rivojlantirish innovatsion iqtisodiyotning muhim tarkibiy qismi ekanini aytdi.
Davlatimiz rahbari raqamli aktivlar aylanmasini legallashtirish, kriptobirjalar ishini tartibga solish, raqamli mayning sohasiga investitsiyalar jalb qilish muhimligini ta’kidladi. Huquqiy bazani yaratish yo‘lidagi birinchi qadam “Raqamli aktivlar to‘g‘risida”gi qonun bo‘ldi. U dastlabki bosqichda muhim rol o‘ynadi, ammo qabul qilinganidan beri bozor sezilarli darajada o‘zgardi. Regulyator va ishtirokchilar sanoatning tabiati va dinamikasini chuqurroq tushunish imkoniyatiga ega bo‘ldilar. Bugun keyingi bosqichga o‘tish talab etiladi, dedi u.
Qirg‘izistonda kriptobank ochiladi
Yanvar oyida “Kriptobanklarni tashkil etish to‘g‘risi”dagi qonun loyihasi Jogorku Keneshga kelib tushgan. Tashabbuskorning so‘zlariga ko‘ra, hujjat “Qirg‘izistonda tadbirkorlik faoliyati sifatida litsenziya asosida virtual aktivlar bilan bog‘liq bir yoki bir nechta turdagi bank xizmatlarini ko‘rsatadigan kriptobanklarni joriy etish maqsadida” ishlab chiqilgan. Iqtisodiyot vazirligi jismoniy va yuridik shaxslar o‘rtasida kriptovalyutalarga qiziqish oshganini ma’lum qilgan.
Izoh (0)