Buyuk Britaniya tashqi ishlar vaziri Devid Kemeron yaqinda Markaziy Osiyo bo‘ylab safari uchun 42 million funt sterling turadigan (52 million dollardan ziyod) hashamatli jet’ni ijaraga olgani uchun tanqidga uchradi. Bu haqda The Guardian xabar berdi.
Tashqi ishlar vaziri o‘tgan haftada Embraer Lineage 1000 samolyotida Tojikiston, Qirg‘iziston, O‘zbekiston, Turkmaniston, Qozog‘iston va Mo‘g‘ulistonga besh kunlik tashrif bilan keldi. Samolyotni boshqaradigan Union Aviation charter firmasiga ko‘ra, bortda vino tanlashda yordam beriladi va “talabchan yo‘lovchilar”ga mos ovqat menyusi taqdim etiladi.
Samolyotning boshqa xususiyatlari qatorida shaxsiy ovqatlanish stoli, shuningdek, kengaytirilgan divanlar bilan alohida dam olish zonasi bor.
“Ba’zida bunday safarda vazirlar rejadan tashqari reyslardan foydalanishi kerak bo‘ladi va agar hukumatning maxsus RAF jet’lari bo‘lmasa, ular samolyotni ijaraga olishi mumkin. Lekin bu tashqi ishlar vazirini Markaziy Osiyo bo‘ylab parvoz qilishda bozordagi eng qimmat, eng hashamatli xususiy samolyotlardan birini ijaraga olishini oqlamaydi.
Bu haddan ziyod isrofgarchilik. Ular davlat xizmatchilari va soliq to‘lovchilarning pullaridan iloji boricha tejamkorlik bilan foydalanishi kerak. Britaniya jamoatchiligi hisobiga opa-singil Kardashyanlar singari dunyo bo‘ylab sayohat qilish kerakmas”, — dedi Leyboristlar partiyasi vakili Emili Tornberri.
Bunga javoban Tashqi ishlar, hamdo‘stlik va taraqqiyot idorasi vakili Kemeronning tashrifiga qancha mablag‘ sarflanishi inobatga olinishini aytdi.
“Uning tashqi ishlar vaziri sifatidagi ishi Britaniya manfaatlarini amalga oshirish uchun chet elga sayohat qilishni talab qiladi. Barcha sayohatda narx va sifat nisbati inobatga olinadi. Xarajat shaffoflik maqsadida muntazam ravishda e’lon qilinadi”, — deydi anonim vakil.
Kemeronning Toshkentga tashrifi
23-aprel kuni Britaniya tashqi ishlar vaziri o‘zbekistonlik hamkasbi Baxtiyor Saidov bilan uchrashdi. Uchrashuvda barcha sohalar bo‘yicha ikki tomonlama aloqalarni mustahkamlashga qaratilgan asosiy vazifalar belgilab olindi.
Shuningdek, ta’lim sohasidagi hamkorlikni rivojlantirishga o‘zaro tayyorlik qayd etildi. Muzokaralar yakunida Keng qamrovli sherikchilik to‘g‘risidagi deklaratsiya, Mintaqaviy va xalqaro bog‘liqlik hamda infratuzilma sohalaridagi hamkorlik to‘g‘risidagi anglashuv memorandumi imzolandi.
Shu kuni Kemeron Oliy Majlis Senati raisi Tanzila Norboyeva bilan ham uchrashuv o‘tkazdi. Suhbat davomida yashil iqtisodiyotni rivojlantirish sohasida qo‘shma loyihalarni yo‘lga qo‘yish, iqlim o‘zgarishi oqibatlariga qarshi kurashda o‘zaro hamkorlikni kuchaytirish muhimligi aytildi.
Devid Kemeron O‘zbekistonda inson huquqlarini taʼminlash, xususan, munosib mehnat tamoyillarini joriy etish, gender tenglikka erishish, oilaviy zo‘ravonlikka qarshi kurashish borasida ijobiy ishlar amalga oshirilayotganini alohida qayd etdi.
Izoh (0)