Исроил Ғазо секторига барча кириш-чиқиш пунктларини тўлиқ ёпганидан бери олти ҳафта ўтди. Бош вазир Нетаньяхунинг гуманитар юкларга ҳам тааллуқли бўлган мазкур қарори оқибатида анклавнинг озиқ-овқат захиралари деярли тугаб бўлди. Маҳаллий аҳоли ва гуманитар ташкилотларнинг огоҳлантиришича, фаластинликлар учун энди бомбалар эмас, очлик асосий хавфга айланган.
Хон Юнисдаги қочқинлар лагерида яшаётган 64 ёшли Реҳоб Ахрас шундай дейди:
“Биз урушдан омон чиқдик, ҳаво ҳужумларидан тирик қолдик. Аммо очликдан қутула олмаймиз — на ўзимиз, на болаларимиз”.
У оиласи билан картон бўлакларини ёқиб, бир дона ловия консервасини иситмоқда — бу уларнинг бор-йўғи. “Биз 13 кишимиз. Битта консерва билан нима қиламиз”? дейди у.
Нонвойхоналар ёпилган, бозорлар эса бўшаб қолган
Авваллари аҳоли учун бепул таом тарқатган фавқулодда ёрдам ошхоналарида узун навбатлар юзага келган. Маҳсулот захираларининг камлиги боис улар озиқ-овқат миқдорини кескин камайтиришга мажбур. Бозорларда эса деярли ҳеч нарса қолмаган, борлари ҳам жуда қиммат нархда сотилмоқда.
“Ҳар куни Ғазода янги туғилган чақалоқлар ва болалар оч ҳолда ухламоқда. Биз бу ерда чуқур очлик босқичига тобора яқинлашмоқдамиз,” деди БМТнинг Фаластинлик қочқинлар бўйича ёрдам агентлиги (UNRWA) вакили Жулиэтте Тоума вазиятнинг нақадар оғирлигини таърифлар экан.
Норвегия Қочқинлар кенгашининг Ғазодаги вакили Гавин Келлеҳерга кўра, озиқ-овқат тақсимоти бутунлай тўхташ арафасида турибди.
Reuters нашрининг анклав аҳолисига таяниб ёзишича, Ғазо бозорларида озиқ-овқат нархлари қуйидагича ўзгарган:
25 кг ун — илгари 6 доллар, ҳозир 60 доллар
1 литр ёғ — илгари 1,50 доллар, ҳозир 10 доллар
1 дона сардина консерваси — 5 доллар атрофида
Франциянинг “Чегарасиз шифокорлар” ташкилоти болалар, ҳомиладор аёллар ва эмизикли оналар орасида ўта оғир тўйиб овқатланмаслик ҳолатлари кузатилаётганини маълум қилди. Кўплаб оналар ўзлари ҳам овқатланмаганлиги сабабли фарзандини эмизолмаяпти.
Нусейратда яшовчи Неама Фаржалла ҳар куни эрталаб бир пиёла гуруч умидида болалари билан уруш зонасида жойлашган бир ошхонадан бошқасига боради.
“Агар ҳаво ҳужумидан ўлмасак, очликдан ўламиз. Болам “Она, мен сут ичмоқчиман” деса, юрагим эзилади,” дейди у.
Яҳудий давлати Ғазода очлик мавжудлигини инкор қилиб, инсонпарварлик ёрдами гўёки ҲАМАС томонидан ўғирланаётганини иддао қилган.
“IDF (Исроил мудофаа кучлари) сиёсий раҳбарият кўрсатмаларига биноан ҳаракат қилмоқда. Биз ёрдамни террор ташкилотлари қўлига топширмаймиз”, дейилади баёнотда.
ҲАМАС эса, ўз навбатида, бу каби даъволарни рад этиб, Исроилни очлик омилидан ҳарбий қурол сифатида фойдаланишда айблаган.
Изоҳ (0)