Ocharchilik sharoitida yashayotgan G‘azo aholisi uchun Kiprdan 1-may kuni 400 tonna hajmida oziq-ovqat yordami jo‘natildi. Bu haqda CNN nashri xabar berdi.
Manbada aytilishicha, Jennifer deb nomlangan kema 1-may kuni tongida Kiprning Larnaka portidan G‘azoga jo‘natilgan. Gumanitar yordam yuklari Isroilning Ashdod portiga yuborilgan. Portlar orasidagi masofa 25-30 soatda bosib o‘tilishi aytilgan.
Ashdod portida qabul qilingan yuklar quruqlik orqali G‘azo shimoliga olib kirilishi xabar qilingan. Hozirda G‘azo shimolidagi o‘tkazuv punkti orqali yuk mashinalari uzluksiz qatnayotgani maʼlum qilingan.
AQSHning Yaqin Sharqdagi qochqinlarga yordam ko‘rsatish birlashmasi (ANERA) raisi Mohenad Itayimning CNN telekanaliga maʼlum qilishicha, 400 tonnalik yordam Ashdod portida Isroil xavfsizlik xizmati qo‘liga o‘tishi belgilangan. Yuklar Kerem Shalom chegara punkti orqali gumanitar halokat nuqtasiga olib kirilishi bildirilgan.
Birlashgan Arab Amirliklari rasmiylari ham endilikda Ashdod porti orqali gumanitar yordam yetkazish dasturida qatnashishlarini maʼlum qilgan.
Yaqin Sharq nashrlari Qo‘shma Shtatlar tomonidan G‘azoga insonparvarlik yordamini yetkazishga imkon beradigan ko‘chma port qurilishi davom etayotganini maʼlum qilgan. U tayyor bo‘lgach Kiprdan va boshqa hududlardan keladigan yordamlar to‘g‘ridan to‘g‘ri G‘azo sektorida qabul qilib olinishi belgilangan.
Maʼlumotlarga ko‘ra, hozirda G‘azo sektorida 2,2 million kishi istiqomat qilmoqda. Ushbu aholining yarmiga yaqini ochlik darajasida yashamoqda.
Izoh (0)