Amerikalik senatorlar ISHID AQSHga hujum qilishidan xavotirlanmoqda

Amerikalik senatorlar Tom Kotton va Marko Rubio ISHID jangarilari AQSHga hujum qilishi ehtimolidan xavotir bildirdi. Bu haqda Hasht-e Subh Daily xabar berdi.

Senatorlarning bayonoti Moskva viloyatidagi Crocus City Hall’dagi teraktdan keyin e’lon qilindi.
Tom Kotton terroristik tashkilot AQSHdagi nishonlarga va xorijdagi amerikaliklarga hujum qilishidan qattiq xavotirda ekanini bildirdi.

“Moskvada begunoh odamlar, ayollar va bolalar o‘ldirilganidan chuqur afsusdaman, ammo keyingi hujum AQSHning Osiyo va Yevropadagi elchixonalariga yoki Yevropaga akademik safari chog‘ida amerikaliklarga bo‘lishi mumkin”, — deb qo‘shimcha qildi u.

Senator buni Amerika qo‘shinlarining Afg‘onistondan “muvaffaqiyatsiz” olib chiqilishi bilan bog‘ladi. Marko Rubio esa senatorlar xorijiy qo‘shinlarning Afg‘onistondan to‘liq olib chiqilishining salbiy oqibatlari haqida ogohlantirganini eslatdi.

“Biz qo‘shinlarni Afg‘onistondan olib chiqishni tezlashtirishni istamasligimizning sabablaridan biri ISHIDga xorijdagi nishonlarga hujum qilish uchun operatsiya maydoni berish edi”, — dedi u.

Rubio ISHIDning Moskvaga uyushtirgan hujumiga ishora qilib, bu guruh hali ham Amerikadagi nishonlarga hujum qilishi mumkinligini aytdi.

Eslatib o‘tamiz, ISHID so‘nggi bir necha oy ichida Afg‘oniston, Eron va Rossiyada qonli hujumlar uyushtirdi. “Tolibon” Afg‘onistonda ISHID yo‘qligini da’vo qilsa-da, xalqaro institutlar va qo‘shni davlatlar Afg‘onistonda ISHIDning Xuroson bo‘limi faolligining kuchayishi va bu guruhning G‘arb davlatlariga hujum qilishi ehtimolidan doimo xavotir bildirib keladi.

Bir necha kun avval Mark Rubio Vashingtonning BMT orqali Afg‘onistonga moliyaviy yordam ko‘rsatishini to‘xtatishga chaqirgandi. U insonparvarlik yordami “terrorchi guruhlar”ni kuchaytirish uchun ishlatilmasligi ta’minlanmaguncha, Afg‘onistonga yordamni to‘xtatish kerakligini aytgan.

Avvalroq AQSH Kongressi Vakillar palatasining Tashqi aloqalar qo‘mitasi rahbari Maykl Makkol ham ISHIDning Amerika va Yevropaga tahdidlaridan xavotir bildirgandi. U qo‘shinlarning Afg‘onistondan olib chiqilishini “katta xato” deb atagan, bu esa, unga ko‘ra, Amerikani xavf ostiga qo‘ymoqda.