Afg‘onistonda 22-iyunga o‘tar kechasi yuz bergan 6,1 magnitudali zilzila oqibatida 1,5 ming kishi halok bo‘lgani, 2 ming kishi jarohatlangan, minglab inshootlar vayron bo‘lgani to‘g‘risida xabar berilgandi.
Zilzila oqibatida jabr ko‘rganlarga yordam ko‘rsatish maqsadida O‘zbekiston prezidenti Shavkat Mirziyoyev topshirig‘iga binoan Afg‘onistonga navbatdagi insonparvarlik yordami yuborildi. Bu haqda Tashqi ishlar vazirligi rasmiy vakili ma’lum qildi.
Ma’lum qilinishicha, oziq-ovqat mahsulotlari, birlamchi zarur predmetlar va medikamentlardan iborat jami 74 tonna yuk ortilgan samolyot Afg‘onistonga jo‘nab ketgan.
Alohida qayd etilganidek, Afg‘onistondagi dahshatli fojiadan so‘ng zudlik bilan ko‘rsatilgan yordam minglab oddiy afg‘onlar hayotini saqlab qolishga xizmat qiladi.
O‘zbekiston va Afg‘oniston xalqlari o‘rtasidagi chuqur tarixiy-ma’naviy, madaniy-gumanitar aloqalarni ta’kidlar ekan, Afg‘oniston Muvaqqat hukumati axborot va madaniyat vaziri v.b. Xayrulla Xayrxva mamlakat hukumati ushbu rishtalarni yanada rivojlantirishga intilayotganini ta’kidladi.
“O‘zbek zamini xazinalari sanalmish qadimiy Samarqand va Buxoro islom madaniyati markazlari bo‘lib kelgan va shunday bo‘lib qoladi, ularni, jumladan, butun afg‘on xalqi e’zozlaydi.
Ishonchimiz komilki, O‘zbekistonning bunday chinakam samimiy ko‘magi qardoshlik rishtalarimizni yanada mustahkamlash, xalqlarimiz va mamlakatlarimiz o‘rtasidagi yaqinlashuvga xizmat qiladi”, — dedi Afg‘oniston madaniyat va axborot vaziri.
O‘zbekiston Prezidentining Afg‘oniston bo‘yicha maxsus vakili Ismatulla Irgashev Afg‘onistonga ko‘rsatilayotgan bu yordamning birodarlik xususiyatiga ega ekanini ta’kidlar ekan, uning insonparvarlik mazmuniga to‘xtaldi.Gumanitar yuklarning Afg‘oniston xalqiga yetkazilishi “afg‘on xalqi uchun eng og‘ir damlarda ham afg‘on zaminida doimo tinchlik va farovonlik haqida o‘ylaydigan” O‘zbekiston Prezidentining shaxsiy tashabbusi ekanligi ta’kidlandi.
O‘zbekistonning 30-aprel kuni Ramazon munosabati bilan Afg‘onistonga yuborgan gumanitar yordami 58 ta vagondan iborat edi. Undan avval 2021-yilning dekabrva sentabroylarida afg‘on xalqi uchun insonparvarlik yuki yetkazilgan.
Izoh (0)