Isroil energetika vaziri Eli Koen 9-mart kuni G‘azo sektoriga elektr energiyasi yetkazib berishni zudlik bilan to‘xtatishni buyurdi. Bu haqda The Times of Israel xabar berdi.
“Men hozirgina G‘azo sektoriga elektr energiyasi yetkazib berishni zudlik bilan to‘xtatish to‘g‘risidagi buyruqni imzoladim. Biz barcha garovga olinganlarni ozod qilish va HAMAS G‘azoda qolmasligini ta’minlash uchun ixtiyorimizdagi barcha vositalarni ishga solamiz”, dedi Koen videomurojaatida.
O‘tgan hafta Isroil G‘azoga insonparvarlik yordami olib kirishni butunlay taqiqladi. Isroil tomoniga ko‘ra, bunga asirlarni almashish bo‘yicha kelishuvning birinchi bosqichi yakunlangani va HAMAS AQSH prezidentining maxsus vakili Stiv Uitkoffning muzokaralarni davom ettirish bo‘yicha takliflarini qabul qilishdan bosh tortgani sabab bo‘lgan. G‘azoga har qanday tovarlarni yetkazib berish 2-mart kuni ertalabdan to‘xtatilgan.
Falastinning HAMAS harakati Isroilning qarorini keskin qoralab, buni harbiy jinoyat va “o‘t ochishni to‘xtatish bo‘yicha kelishuvga jiddiy zarba” deb atagan.
Avvalroq Isroil elektr ta’minotini uzishi haqida The Guardian nashri xabar bergan edi. Nashr tilga olgan “jahannam rejasi” G‘azodagi qamalni yanada kuchaytirishni nazarda tutadi. Hozircha olti haftalik vaqtinchalik tinchlik kelishuvi kuchda qolayotgan bo‘lsa-da, uning keyingi bosqichi haqida muzokaralar olib borilmayapti. Shu sababli Isroil va HAMAS yana urushga qaytish ehtimoliga tayyorgarlik ko‘rmoqda.
Isroil G‘azoga oziq-ovqat va yonilg‘i ortilgan gumanitar yordamni to‘xtatishdan tashqari sektorning 2,2 million aholisini asta-sekin to‘liq izolyatsiya qilishga tayyorgarlik ko‘rmoqda. Hukumat bu choralar dasturini “jahannam rejasi” deb atagan.
Izoh (0)