Наврўз байрами ҳамда Рамазон ҳайити муносабати билан Ўзбекистондан афғон халқига қарийб 200 тоннадан ортиқ озиқ-овқат маҳсулотлари ортилган навбатдаги инсонпарварлик ёрдами етказилди. Бу ҳақда Сурхондарё вилояти ҳокимлиги ахборот хизмати хабар берди.
Маълум қилинишича, 21 март куни афғон халқига навбатдаги инсонпарварлик ёрдами юки ортилган махсус юк машиналари Термиз орқали Афғонистоннинг Балх вилоятига юборилган.
Инсонпарварлик ёрдами таркибидан ун, буғдой, макарон маҳсулотлари, ўсимлик ёғи, шакар, тез тайёрланадиган таомлар, қизил ловия ва мош ўрин олган.
Қўшни мамлакатга етказилган маҳсулотлар Ҳайратон шаҳридаги “Астрас” компанияси ҳудудида икки томон расмийлари иштирокида топширилган.
Таъкидланишича, Мозори Шариф шаҳрида расмийлар иштирокида икки томонлама учрашув ўтказилиб, келгусидаги ҳамкорлик алоқаларини ривожлантириш масалалари муҳокама қилинган.
Суҳбат давомида Ўзбекистон томонидан Афғонистонда барпо этилаётган Имом Бухорий мақбараси қурилиши ҳақида ҳам алоҳида фикр алмашинган.
Афғонистон расмийлари Ўзбекистон президенти ва халқига кўрсатаётган ёрдам учун миннатдорчилик билдириб, яқинлашиб келаётган Рамазон ҳайити муносабати билан самимий табрикларини йўллашган.
Ўтган йилнинг декабрь ойида президент Шавкат Мирзиёевнинг топшириғи билан, Афғонистон аҳолисига инсонпарварлик ёрдами ва “Саломатлик” поезди жўнатилганди.
Апрель ойида Сурхондарё вилояти ҳокими Улуғбек Қосимов бошчилигидаги делегация Ўзбекистон халқи номидан биродар афғон халқига навбатдаги инсонпарварлик ёрдамини етказган эди.
Шунингдек, 2023 йил апрелда ҳам Ўзбекистондан афғон халқига 185 тоннадан ортиқ зарурий озиқ-овқат маҳсулотлари ортилган навбатдаги инсонпарварлик ёрдамини жўнатганди.
2022 йилда бўлса зилзила оқибатида жабр кўрганларга ёрдам кўрсатиш мақсадида Ўзбекистон президенти Шавкат Мирзиёев топшириғига биноан Афғонистонга навбатдаги инсонпарварлик ёрдами юборилган эди.
Изоҳ (0)