“Afg‘onistondagi vaziyatga jiddiy e’tibor qaratish lozim” — To‘qayev

Qozog‘iston prezidenti Qosim-Jomart To‘qayev Shanxayga a’zo mamlakatlar tashqi ishlar vazirlari bilan uchrashuvda Afg‘onistonda gumanitar inqirozning oldini olishga chaqirdi. Bu haqda “Akorda.kz” xabar berdi.

To‘qayev, shuningdek, Afg‘onistonda barqarorlikni o‘rnatish uchun ushbu mamlakatdagi vaziyatga jiddiy e’tibor qaratish zarurligini ta’kidlagan.

Uning qo‘shimcha qilishicha, Afg‘onistondagi vaziyat diqqat bilan qarashni talab qiladi. Gumanitar inqirozning oldini olish va uzoq muddatli barqarorlik uchun shart-sharoit yaratish bo‘yicha sa’y-harakatlarni davom ettirish juda muhimdir.

Qozog‘iston rahbari Olmaota shahrida BMTning Markaziy Osiyo va Afg‘oniston uchun barqaror rivojlanish maqsadlari bo‘yicha mintaqaviy markazini tashkil etish tashabbusini qo‘llab-quvvatlagan.

Avvalroq O‘zbekiston Afg‘onistonda sel-suv toshqinlarida zarar ko‘rgan aholiga insonparvarlik yordami jo‘natgan edi. Yordam, xususan, 48 tonna un, 22 tonna guruch, 100 ming dona konserva va 44 tonna makaron mahsulotlari, 25 ming litr o‘simlik yog‘i, 100 ming dona tez tayyorlanadigan lag‘mon, shuningdek, 10 kishilik 100 ta maxsus qurilmali chodir va 1 000 litrli 96 ta suv saqlash idishlarini o‘z ichiga olgan.