Avvalroq “O‘zbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasini tasdiqlash to‘g‘risida”gi qonun qabul qilingani haqida xabar berilgandi. Adliya vazirligining xabar berishicha, konsepsiya bilan diniy tashkilotlar va davlat organlari o‘zaro bir-birining faoliyatiga aralashmaydi.
Konsepsiyaga ko‘ra, dinning davlatdan ajratilganligi prinsipi diniy tashkilotlar va davlat organlari o‘zaro bir-birining faoliyatiga aralashmasligi, davlat diniy tashkilotlar zimmasiga davlatning biror-bir vazifalarini yuklamasligi, diniy tashkilotlarning davlat funksiyalarini amalga oshirishiga yo‘l qo‘ymasligiga oid qoidalarni nazarda tutadi.
Ushbu prinsip diniy qarashlardan qatʼi nazar, konstitutsiyaviy huquqiy tizim (huquq normalari va ularni qo‘llash), demokratiya, dunyoviylik, erkinlik, tenglik, insonparvarlik, ijtimoiy adolat va birdamlik, inson huquqlari g‘oyalariga tayanadi.
Konsepsiyaga ko‘ra, fuqarolarning vijdon erkinligiga bo‘lgan huquqini izchil ro‘yobga chiqarish, jamiyatda konfessiyalararo munosabatlarni yanada mustahkamlash yo‘nalishida davlat siyosatini amalga oshirishning asosiy mexanizmlari quyidagilardan iborat, jumladan:
- fuqarolarning vijdon erkinligiga bo‘lgan huquqini amalga oshirish kafolatlarini taʼminlash, diniy tashkilotlarning qonuniy faoliyati uchun zarur tashkiliy-huquqiy shart-sharoitlar yaratish;
- davlat organlarining diniy tashkilotlar bilan o‘zaro aloqalari va hamkorligini vakolatli davlat organi orqali muvofiqlashtirish;
- konfessiyalararo totuvlikni va diniy bag‘rikenglikni taʼminlashda davlat organlari, diniy tashkilotlar va fuqarolik jamiyatining boshqa institutlari o‘rtasidagi hamkorlikni mustahkamlash;
- ziyorat turizmi, boshqa diniy rasm-rusumlar va marosimlar xavfsiz o‘tkazilishini taʼminlash masalalari bo‘yicha fuqarolar, diniy tashkilotlar va davlat organlarining hamkorligini taʼminlash;
- diniy konfessiyalarning bayramlarini tashkil etish va o‘tkazish uchun zarur shart-sharoitlar yaratish.
Fuqarolarning vijdon erkinligini taʼminlash va diniy sohadagi davlat siyosati konsepsiyasi
“O‘zbekiston Respublikasida fuqarolarning vijdon erkinligini ta’minlash va diniy sohadagi davlat siyosati konsepsiyasini tasdiqlash to‘g‘risida”gi qonun loyihasi va u bilan tasdiqlanayotgan konsepsiya loyihasi 31-yanvar kuni quyi palata majlisida birinchi o‘qishda qabul qilinib, 10-fevralgacha jamoatchilik muhokamasi uchun joylashtirilgan edi. Jamoatchilik muhokamasi jarayonida aholidan 400 tadan ortiq izohlar, taklif va tavsiyalar kelib tushgan.
Oliy Majlis Qonunchilik palatasining 11-fevraldagi yalpi majlisida ushbu qonun loyihasi qabul qilingandi.
Senatning 20-fevraldagi to‘rtinchi yalpi majlisida O‘zbekistonda diniy sohadagi davlat siyosati konsepsiyasini ma’qullangandi.
26-fevral kuni “O‘zbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasini tasdiqlash to‘g‘risida”gi qonun qabul qilindi.
Izoh (0)