O‘zbekiston prezidentining Afg‘oniston bo‘yicha maxsus vakili Ismatulla Irgashev Qatar elchisi Hasan Hamza Asad Muhammad Hoshim bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, tomonlar Afg‘oniston bo‘yicha O‘zbekiston—Qatar hamkorligining bugungi holatini muhokama qilgan. Bu yo‘nalishda muntazam muloqotni davom ettirishdan o‘zaro manfaatdorlik taʼkidlangan.
Suhbat chog‘ida 2024-yilning fevral oyida Qatar poytaxti Doha shahrida BMT bosh kotibi Antoniu Guterrish raisligida bo‘lib o‘tadigan Afg‘oniston bo‘yicha maxsus vakillarning uchrashuviga alohida eʼtibor qaratilgan.
Ushbu tadbir jahon hamjamiyatining Afg‘onistondagi vaziyatni barqarorlashtirish bo‘yicha samarali yechimlarni taklif etish va harakatlarini muvofiqlashtirish, afg‘on xalqiga insonparvarlik yordami ko‘rsatishda muhim ahamiyat kasb etishi taʼkidlangan.
Shavkat Mirziyoyev 2023-yil 19-iyul kuni Markaziy Osiyo mamlakatlari va Ko‘rfaz arab davlatlari hamkorlik kengashi yetakchilarining birinchi sammitida Afg‘onistonda tinchlikka erishish masalalariga to‘xtalib o‘tgandi.
Bizning mintaqalarimiz tashabbuskor bo‘lib, katta-katta minbarlardan Afg‘oniston muammolariga butun dunyo eʼtiborini jalb etishimiz, afg‘on xalqining hayotini yengil qilishga munosib hissa qo‘shishimiz kerak, — degan edi davlat rahbari.
Izoh (0)