Madridning “Real” klubi ustozi Karlo Anchelotti Ispaniya La Ligasi 28-turi doirasidagi “Vilyarreal”ga qarshi uchrashuvdan keyingi matbuot anjumanida, futbolchilar endi kamida 72 soatlik dam olish vaqtisiz maydonga tushmasligini e’lon qilgan edi.
La Liga rahbari Xavyer Tebas “qirollik klubi”ning ushbu bayonotiga munosabat bildirdi. Unga ko‘ra, madridliklar o‘yinlar jadvalini o‘zgartirish bo‘yicha rasmiy so‘rov yubormagan. “Real” ilgari oldindan so‘rov yuborganida, bu talablar qondirilganini aytgan.
Shuningdek, La Liga vakili jamoalar uchun doimo qulay jadval belgilanishini ma’lum qildi. Uning so‘zlariga ko‘ra, La Liga dastlab 30-mart kuni bo‘ladigan “Leganes” bilan o‘yinni shanba kuni soat 16:15 ga belgilagan. Bu esa “Real”ga “Real Sosyedad” bilan bo‘ladigan Ispaniya Kubogi yarim finalidan oldin ko‘proq dam olish imkonini berishi kerak edi.
Biroq, “Real” vakili Emilio Butrageno La Liga musobaqalar direktoridan o‘yinni soat 21:00 ga ko‘chirishni so‘ragan, bu esa xalqaro o‘yinlardan qaytgan futbolchilarga qulaylik yaratish maqsadida amalga oshirilgan.
Natijada, o‘yinning kechiktirilishi tufayli “Real” seshanba kuni bo‘ladigan yarim finalga 72 soatdan kam vaqt ichida chiqishi kerak bo‘ladi, deydi La Liga rahbari o‘zining X sahifasida.
Ma’lumot uchun, “Real” ayni payt Ispaniya chempionati turnir jadvalida 60 ochko bilan 2-o‘rinni egallab turibdi. Xuddi shuncha ochkoga ega “Baselona” esa 1-pog‘onadan joy olgan.
Izoh (0)