Madridning “Real” klubi vingeri Vinisius Junior ilk bor jamoa sardori sifatida maydonga tushganidan keyin o‘z fikrlari bilan o‘rtoqlashdi. U Ispaniya Kubogi yarim final bosqichi doirasidagi “Real Sosyedad”ga qarshi o‘yinda (0:1) sardorlik bog‘ichi bilan harakat qildi.
Men “Real” tarixiga kirib, bu klub safida 500 ta o‘yin o‘tkazishni istayman. 24 yoshimda dunyoning eng yaxshi jamoasi sardori bo‘lish – tasvirlab bo‘lmas tuyg‘u, deya Vinisius Juniorning so‘zlarini keltiradi insayder Fabrisio Romano.
Avvalroq matbuotda Saudiya Arabistoni klublarining 24 yoshli futbolchiga bo‘lgan qiziqishi haqida xabarlar tarqalgan edi. Bir qancha klublar Vinisiusni qo‘lga kiritish uchun uning 1 milliard yevrolik tovon pulini to‘lashga tayyor ekani aytilmoqda.
Ma’lumot uchun, hozirgi vaqtgacha braziliyalik hujumchi “Real” safida 299 ta o‘yin o‘tkazgan. Klub rekordchisi esa Raul Gonsales hisoblanadi. U 1994–2010-yillar oralig‘ida “qaymoqranglilar” safida 741 ta rasmiy o‘yin o‘tkazgan.
“Real” safida eng ko‘p o‘yin o‘tkazgan 5 o‘yinchi:
- Raul Gonsales — 741 o‘yin
- Iker Kasilyas — 725 o‘yin
- Serxio Ramos — 671 o‘yin
- Manuel Sanches — 710 o‘yin
- Karim Benzema — 648 o‘yin
“Real” klubi La Liga doirasidagi keyingi uchrashuvni ertaga, 1-mart kuni “Betis”ga qarshi o‘tkazadi. Jamoa 25 turdan so‘ng 54 ochko to‘plagan holda “Barselona” bilan turnir jadvalida peshqadamlikni bo‘lishib turibdi.
Izoh (0)