“Real” yetakchi, “Barselona”da esa sezilarli darajada o‘sish kuzatilgan. La Liga klublarining maoshlar chegarasi e’lon qilindi

Madridning “Real” klubi ispan klublari ichida eng yuqori maosh limitiga ega. 

La Liga yozgi transferlar oynasi yakunlangach, Ispaniyaning birinchi va ikkinchi divizion klublari futbolchilari va murabbiylar shtabi uchun maosh miqdorini e’lon qildi. Xarajatlar limitiga doimiy va o‘zgaruvchan ish haqi, ijtimoiy sug‘urta, jamoaviy sug‘urta badallari, transfer xarajatlari, shu jumladan agentlar komissiyalari va amortizatsiya kiradi. 

“Real” ushbu ko‘rsatkich bo‘yicha yetakchiligini saqlab qoldi — Madrid klubi maoshlar uchun 754,9 million yevro sarflashi mumkin. Qishki transferlar oynasida esa “Real”ning maoshlar chegarasi 727,45 million yevroni tashkil etgan edi.

Ikkinchi o‘rinda esa Kataloniyaning “Barselona” jamoasi joylashgan. “Ko‘k-anorranglilar”ning maoshlar limiti 270 dan 426 million yevrogacha oshgan. Marca nashrining yozishicha, “Barselona”ning moliyaviy holati sezilarli darajada yaxshilanganiga qaramasdan, klubning maoshlar ko‘rsatkichi ortiqcha bosim ostida qolmoqda va qishda klub yana futbolchilarni ro‘yxatdan o‘tkazishda muammolarga duch kelishi mumkin.

Ispaniya klublari orasida 3-o‘rinni 310,7 million yevro bilan “Atletiko” egallab turibdi.