Madrid klubi 34 yoshli himoyachining jamoadan ketishini e’lon qildi. Avvalroq uning Saudiyaning “Al-Qadisiya” jamoasiga o‘tishi haqida ma’lumotlar paydo bo‘lgandi.
Nacho 2001-yildan beri “Real Madrid” jamoasi bilan birga. U asosiy jamoada 364 ta o‘yin o‘tkazib, 26 ta sovrinni qo‘lga kiritgan. Futbolchi klub bilan Chempionlar Ligasida (6 marta), Klublar o‘rtasidagi jahon chempionatida (5 marta), Ispaniya Superkubogida (5), Yevropa Superkubogida (4), La Liga (4) va Ispaniya kubogi (2) da g‘olib chiqqan.
“Nacho akademiyamizga kelganidan beri hamma uchun o‘rnak bo‘lib kelgan va barcha “Real Madrid” muxlislarining mehrini, e’tirofini va hayratini qozongan. “Real Madrid" har doim uning uyi bo‘lgan va shunday bo‘lib qoladi”, — deydi klub prezidenti Florentino Peres.
Futbolchi jamoa bosh murabbiyi, klubdagi jamoadoshlari va muxlislariga xayrlashuv xatini yozdi.
“Men sizga bir nechta so‘zlarimni bag‘ishlamoqchiman, ular hozirgi paytda his qilayotgan barcha narsani ifodalash uchun yetarli emas. Men hayotimning bir bo‘lagi bo‘lgan “Real Madrid” klubi bilan xayrlashaman. Men klubga 10 yoshimda keldim, shaxs va futbolchi sifatida shakllandim, g‘alaba qozonishni va mag‘lub bo‘lishni, kurashish va azob chekishni, zavqlanishni va doimo ishtiyoq va qat’iyat bilan yashashni o‘rgandim.
25 yil davomida har kuni bir joyga kelaman, “Real Madrid”ning qadriyatlarini o‘rgandim, klub uchun jonimni berdim. Bu men uchun juda qiyin. Ammo endi maydonda ham, maydon tashqarisida ham ushbu jamoaning timsolini namoyon etish uchun qo‘limdan kelgan barcha ishni qilganimni bilib, ishonch va xotirjamlik bilan ketish vaqti keldi. Bolaligimda “Santyago Bernabeu” stadionimizda o‘ynashni orzu qilardim va bugun men 15-Chempionlar Ligasini ko‘tarishga muvaffaq bo‘lgan sardor sifatida klubdan ketishga qaror qildim.
“Real Madrid” o‘yinchisi sifatidagi faoliyatim yakuni chiroyli bo‘lishini xohlardim. Va shuni ayta olamanki, bundan yaxshiroq bo‘lishi mumkin emas.
Prezident, yordamingiz va menga bo‘lgan ishonchingiz uchun rahmat.
Jamoam, siz mening birodarlarimsiz. Jamoa sardorida bo‘lishi mumkin bo‘lgan eng yaxshi o‘yinchilar, jamoadoshlar va do‘stlar.
Janob Karlo Anchelotti, siz o‘z talablaringiz bilan meni kuchliroq qildingiz. Menga qilgan g‘amxo‘rligingiz uchun rahmat.
“Real Madrid” muxlislari, sizning talablaringiz bizni ajoyib futbolchilarga aylantiradi. Hammasi uchun rahmat. Siz uchun o‘ynash va mehringizni his qilish meni kuchliroq qildi. Unutmayman... Oxirigacha!!
Yillar davomida men bilan birga ishlagan va meni yaxshiroq futbolchi va inson qilgan yuzlab odamlarga o‘z minnatdorchiligimni bildirmoqchiman. Murabbiylar, fizioterapevtlar, xodimlar, shifokorlar, mutlaqo hamma... Katta harflar bilan yozilgan RAHMAT.
Shu yo‘lda qo‘limdan ushlab, meni hech qachon qo‘yib yubormagan ota-onam, xotinim va bolalarim, oilam va do‘stlarimga ham rahmat. Ba’zan bu oson bo‘lmadi, lekin sizning sa’y-harakatlaringiz va yordamingiz mening orzumni amalga oshirishga va cho‘qqiga chiqishga imkon berdi.
24 yillik faoliyatdan so‘ng sizlar bilan xayrlashaman.
Meni o‘z klubi uchun borini bergan yigit sifatida eslab qolishingizni istardim. Chin yurakdan rahmat.
Bundon buyon men klubning har bir g‘alabasi, har bir unvoni uchun xursand bo‘luvchi sodiq muxlisga aylanaman.
Tez orada ko‘rishguncha, Madridistlar”, — deya xayrlashuv xatini yakunladi Nacho Fernandes.
Izoh (0)