O‘zbekistonda Ixtisoslashtirilgan ta’lim muassasalari agentligi tizimida Al-Beruniy nomidagi xalqaro maktab-internatni tashkil etiladi.
“Prezident iqtidorli farzandlari” tashabbusini amalga oshirish chora-tadbirlari to‘g‘risidagi prezident farmoniga ko‘ra, maktabda darslar 2025/2026-o‘quv yilidan boshlanadi.
Ushbu maktab bitiruvchilariga davlat namunasidagi ta’lim to‘g‘risidagi hujjat (shahodatnoma) bilan bir qatorda yetakchi xorijiy oliy ta’lim tashkilotlariga o‘qishga kirish imkonini beruvchi xalqaro ta’lim dasturi diplomi (International Baccalaureate) beriladi.
O‘quvchilar bilan individual ishlash tizimi joriy etilib, 1 nafar maslahatchi va pedagogga to‘g‘ri keladigan o‘quvchilar soni nisbatining cheklangan normativiga mutanosib ravishda 1:15 va 1:8 nisbatlar qo‘llanadi.
Maktabda ta’lim jarayoni variativ o‘quv rejalar asosida amalga oshiriladi hamda o‘quvchilar ingliz tilidan tashqari kamida yana bitta qo‘shimcha xorijiy tilga o‘qitiladi. Maktabda davlat byudjeti mablag‘lari hisobidan o‘qitiladigan o‘quvchilarning umumiy cheklangan soni 180 nafarni tashkil etadi.
O‘quvchilarga ilmiy-tadqiqot va innovasion startap loyihalar hamda boshqa ijtimoiy loyihalar bo‘yicha o‘zining portfoliosini shakllantirishga ko‘mak beriladi.
Farmonga ko‘ra, “Prezident iqtidorli farzandlari” tashabbusi va uni qo‘llab-quvvatlash bo‘yicha milliy dastur amalga oshiriladi. Shuningdek, Iqtidorli yoshlarni qo‘llab-quvvatlash hamjamiyati faoliyati yo‘lga qo‘yiladi.
Milliy dasturni amalga oshirish doirasida quyidagi rag‘batlantirishlar qo‘llanadi:
- Al-Beruniy nomidagi xalqaro maktab-internat ning 10-sinf o‘quvchilari va Milliy dastur ishtirokchisi bo‘lgan va eng yaxshi ko‘rsatkichga ega 40 nafar o‘quvchiga dunyoning nufuzli oliy ta’lim tashkilotlari tomonidan tashkil etiladigan qisqa muddatli o‘quv dasturlarida har yili 1 marotaba qatnashish;
- maktab bitiruvchilari va Milliy dastur ishtirokchisi bo‘lgan o‘quvchilarning xalqaro miqyosda e’tirof etilgan akademik reytingning eng ilg‘or 100 ta oliy ta’lim tashkilotlari ro‘yxatidan joy olgan xorijiy oliy ta’lim tashkilotlarida ta’lim olish xarajatlarini belgilangan tartibda qoplash;
- maktab maslahatchilarini ularga biriktirilgan o‘quvchilarning oliy ta’lim tashkilotlariga o‘qishga qabul qilinishiga qarab, mazkur farmonga muvofiq bir martalik pul mukofoti bilan taqdirlash.
Al-Beruniy nomidagi xalqaro maktab-internat bitiruvchilari va Milliy dastur ishtirokchilarining xorijda ta’lim olishi uchun 2027-yildan boshlab 200 tadan kvotalar ajratiladi. Kvota talablariga javob beradigan Maktab bitiruvchilari va Milliy dastur ishtirokchisi bo‘lgan o‘quvchilar soni 200 nafardan kam bo‘lgan taqdirda, o‘qishga yuborish bo‘yicha tanlov o‘tkazilmaydi.
Shavkat Mirziyoyev 15-may kuni o‘tkazgan videoselektor yig‘ilishida “Prezident iqtidorli farzandlari” milliy dasturini boshlash va “Garvardchilar maktabi”ni ochish bo‘yicha katta farmon imzolaganini aytgandi. Prezident bu yil 8-sinf bitiruvchilaridan 60 nafari saralab olinib, xalqaro maktabda “Top-10” oliygohlariga maqsadli tayyorlanishini qayd etgandi.
Izoh (0)