Afg‘oniston adliya vaziri Abdul Hakim Shariy rossiyalik amaldorlarga qamoqxonalarni qanday qilib to‘g‘ri qurish va inson huquqlarini himoya qilish haqida gapirdi. “Tolibon” rasmiysi Sankt Peterburg xalqaro yuridik forumida nutq so‘zladi.
Forumda Rossiyaning yuqori martabali amaldorlari, xususan, adliya vaziri Konstantin Chuychenko va uning o‘rinbosari Oleg Sviridenko ham ishtirok etgan. Shariy o‘z nutqida Afg‘onistonda shariat me’yorlari, shuningdek, “afg‘on xalqining diniy, tarixiy va madaniy qadriyatlari”ga asoslangan “sof islomiy adolat tizimi” yaratilganini aytgan. U bunday model har bir insonning huquqlarini to‘liq himoya qilishini taʼkidlagan.
Islom shariatiga muvofiq amalga oshiriladigan odil sudlov va nazorat haqiqatning tantana qilishini, korrupsiyaning ildizidan yo‘q qilinishini hamda unga muhtoj bo‘lgan har bir kishining qonuniy huquqlari kafolatlanishini ta’minlaydi, deya uning so‘zlarini keltiradi “Fontanka” nashri.
Shuningdek, Shariy afg‘on qamoqxonalari “axloqiy, diniy va ijtimoiy reabilitatsiya” amalga oshiriladigan “tuzatish markazlari” ekanini ham aytdi.
U bunday qamoqxonalar mahkumlarda mas’uliyat hissini uyg‘otishini taʼkidladi. Vazir Islom tamoyillari Afg‘onistonda “muqaddas” sanalib, “eng oliy qadriyat”ga ega ekanini bildirdi. U Afg‘oniston nafaqat islomiy qadriyatlarni, shuningdek, “Islom amirligi suvereniteti, hududiy yaxlitligi va qadr-qimmatini” hurmat qiladigan davlatlar bilan hamkorlik qilishga tayyorligini bildirdi.
Izoh (0)