Madridning “Real” klubi Ispaniya La Ligasi 28-turi doirasida “Vilyarreal”ga qarshi maydonga tushdi va 2:1 hisobida g‘alaba qozondi. Uchrashuvdan keyingi matbuot anjumanida “qirollik klubi” bosh murabbiyi Karlo Anchelotti jamoasi endi kamida 72 soatlik dam olish vaqtisiz maydonga tushmasligini e’lon qildi. Bu haqida Marca nashri xabar berdi.
Madrid klubi 12-mart kuni UEFA Chempionlar Ligasi 1/8 final bosqichi doirasida “Atletiko” bilan o‘yin o‘tkazdi. Oradan atigi uch kun o‘tib, 15-mart kuni Ispaniya chempionati navbatdagi turida ishtirok etdi.
O‘yindan so‘ng Anchelotti bu borada La Ligani tanqid qildi va bunday holat takrorlansa, jamoa chempionatga boykot e’lon qilishini aytdi.
Bugun 72 soatdan kam vaqt dam olib, navbatdagi uchrashuvni o‘tkazdik. Biz boshqa bunday qilmaymiz. Rahbariyat bu borada Liga bilan ikki marta bog‘landi, lekin hech qanday o‘zgarish bo‘lmadi. Agar talab qilingan dam olish vaqti berilmasa, “Real” klubi boshqa La Liga bahslarida maydonga tushmaydi, dedi italiyalik mutaxassis.
Ushbu bayonot “Real” rahbariyati va La Liga o‘rtasidagi munosabat keskinlashishiga sabab bo‘lishi mumkin. Sababi klub o‘z futbolchilarining jismoniy tayyorgarligini saqlab qolish va jarohatlardan himoyalash maqsadida qat’iy choralar ko‘rishni rejalashtirmoqda.
Ma’lumot uchun, “Real” 28-turdan keyin 60 ochko bilan turnir jadvali 1-pog‘onasidan joy oldi. Ulardan 2 ta kam o‘yin o‘tkazgan “Barselona” esa 57 ochko bilan keyingi o‘rinni egallab turibdi.
Izoh (0)