Madridning “Atletiko” jamoasi La Liganing 19-turida “Osasuna”ni 1:0 hisobida mag‘lubiyatga uchratib, ketma-ket g‘alabalar bo‘yicha yangi klub rekordini o‘rnatdi. Bu haqda Opta Sport xabar bermoqda.
Diyego Simeone boshqaruvidagi jamoa ketma-ket 14 ta o‘yinda g‘alaba qozondi. “Matraschilar” Ispaniya chempionatida ketma-ket sakkizta, Ispaniya Kubogi doirasida uchta, shuningdek, Chempionlar Ligasi guruh bosqichida yana uchta o‘yinda muvaffaqiyatga erishdi.
Bunga qadar “Atletiko”ning eng uzoq davom etgan g‘alabalar seriyasi 2012-yilning avgustidan oktyabrigacha bo‘lgan davrga to‘g‘ri kelgan edi. O‘sha paytda ham jamoani argentinalik murabbiy Diyego Simeone boshqargan.
Hozirda “Atletiko” 19 ta o‘yindan so‘ng 44 ochko to‘plab, La Liga turnir jadvalida birinchi o‘rinni egallab turibdi. Madridliklar keyingi o‘yinini 15-yanvar kuni Ispaniya Kubogi 1/8 finali doirasida “Elche”ga qarshi o‘tkazadi.
Izoh (0)