Ronaldudan Gundo‘g‘angacha. Premyer Ligaga qaytgan mashhur futbolchilar

Ko‘pchilik futbolchilar APLda o‘ynashni xohlaydi. Ba’zida Angliyada o‘ynab boshqa chempionatlarda ham omadini sinab ko‘rgisi kelgan futbolchilar yana futbol vatani havosini sog‘inib qaytib keladi.

Masalan, ushbu yozning eng kutilmagan transferlaridan biri shubhasiz Gundo‘g‘an bo‘ldi. U “Manchester Siti”ga qaytdi. 

Germaniyalik futbolchi APLga qaytgan birinchi top futbolchi emas.

Gundo‘g‘an 2023-yilda “Manchester Siti” sardori bo‘lganidan ko‘p o‘tmay “Barselona”ga o‘tgan edi, biroq La Liga klubining moliyaviy ahvoli tangligi sabab nemis futbolchisini qo‘yib yuborishga majbur bo‘ldi va “Manchester Siti” uni bunday imkoniyatni qo‘ldan boy bermadi.

APLni tark etib yana qaytgan mashhur futbolchilar bilan tanishtiramiz.

Krishtianu Ronaldu

“Qizil iblislar” tomonidan qaytarib olingan Ronalduning “Old Trafford”ga qaytishi ijtimoiy tarmoqlarda ijobiy qabul qilindi. Ronalduning “Nyukasl”ga qarshi ikkinchi o‘yinida ikki marta gol urganidan keyin bu quvonch karrasiga ortdi.

Biroq ishlar rejadagidek ketmadi. Ronaldu muntazam ravishda gol urdi, ammo jamoani chempionlik uchun kurashga ilhomlantira olmadi va 2022-yilning noyabrida klubni tark etdi.

Tyerri Anri

2007-yilning yozida Anrining “Barselona”ga o‘tishini hech kim kutmagan edi. Ko‘pchilik 2006-yilgi Chempionlar Ligasi finalidagi “Arsenal”ning mag‘lubiyatidan so‘ng hujumchi bu harakatni amalga oshirishini kutgan. Buning o‘rniga u yangi shartnoma imzoladi, ammo baribir bir yil o‘tib ketdi.

Oxir-oqibat “Nyu-York Red Bulls” jamoasiga qo‘shilgan Anri 2012-yilning yanvarida ikki oylik ijara asosida MLSdan Shimoliy Londonga qaytdi.

Futbolchi Premyer Ligaga qisqa vaqtga qaytdi, ammo Angliya Kubogida “Lids Yunayted”ga va APL doirasida “Sanderlend”ga urilgan gollar uni muhim futbolchiga aylantirdi.

Yurgen Klinsmann

1994-yili Klinsmann Angliyaga yo‘l olganida unga yangi muxlislarni mehrini qozonishdek qiyin vazifa turardi. Sababi futbol olamida u “simulyant” (ayyorlik ishlatuvchi) futbolchi sifatida mashhur edi. Hattoki jurnalistlardan biri nemis futbolchisining Angliya tashrifi nega nafrat uyg‘otishi haqida maqola ham yozgan.

Biroq atigi bir mavsumdan so‘ng Klinsmann “Bavariya”ga o‘tish uchun Germaniyaga yo‘l oldi.

Ikki yildan so‘ng 1997/98-yilgi mavsumda “shporlar”ni quyi ligaga tushib ketishidan saqlab qolish uchun ijara asosida APLga qaytdi.

Didye Drogba

Drogba 2012-yilda Myunxenda Chempionlar Ligasi finalida penaltini aniq amalga oshirib, “Chelsi”dagi sakkiz yillik faoliyatini ajoyib tarzda yakuniga yetkazgan edi. Ammo ikki yil davomida Xitoy va Turkiyada vaqt o‘tkazib yana APLga qaytib keldi. 2014-yilda Kot d’ivuarlik forvard shunday degan edi:

“Joze Mourinyo bilan yana ishlash imkoniyatini rad eta olmadim. Bu klubga qanchalik mehrim borligini hamma biladi va u har doim mening uyim bo‘lib kelgan. G‘alabaga bo‘lgan ishtiyoqim saqlanib qolgan va men bu jamoaga yordam berishni intiqlik bilan kutyapman. Faoliyatimning keyingi bosqichini intiqlik bilan kutyapman”.

Drogba bir yil o‘tib Premyer Liga chempionligini qo‘lga kiritdi va “Chelsi”dagi faoliyatini yakunladi.

Garet Beyl

Beyl 2013-yilda “Tottenhem”ni tark etib, “Real”ga o‘tganida o‘sha davrdagi eng qimmat futbolchiga aylangandi. 2020-yilda ijara asosida Angliyaga qaytganida, uning hisobida Chempionlar Ligasi g‘oliblari uchun beriladigan to‘rtta medal bor edi, ammo Bernabeuda futbolchi yetarli mashhurlikka erisha olmadi.

Uning qaytishi, albatta, muvaffaqiyatsiz bo‘lmadi. Futbolchi 34 ta o‘yinda 16 ta gol urdi, ammo jamoasi bilan sovrin yuta olmadi.

Pol Pogba

Pogbaning “Manchester Yunayted”ga qaytishi turlicha qarashlar bilan kutib olindi.

Fransiyalik futbolchi endi “Yuventus”dagi kabi tez-tez namoyon etadigan ajoyib qobiliyatlarga ega emas edi. Shu bilan birga, albatta, uning Angliya qaytishi katta xato deb ham bo‘lmaydi.

6 yil davomida “Manchester Yunayted”da o‘ynagan futbolchi 154 uchrashuvda maydonga tushdi va 29 ta gol muallifiga aylandi.

Nikolya Anelka

Parijdan “Arsenal” klubiga ko‘chib o‘tgan futbolchi keyinchalik “Real Madrid” qo‘shiladi. Shundan keyin yana “PSJ” ga qaytadi. So‘ngra “Liverpul”da ijara asosida o‘ynagan futbolchi “Manchester Siti” bilan shartnoma imzolaydi.

Uch yildan so‘ng “Fenerbaxche” bilan Turkiyaga yo‘l oldi va bir yildan so‘ng “Bolton” bilan shartnoma imzoladi. Buning ortidan “Chelsi”ga o‘tdi. Shundan so‘ng u yana Angliyani tark etdi, bu safar Xitoyga — “Shanxay Shenxua” klubiga ko‘chib o‘tdi.

Shundan so‘ng u Italiyada o‘ynadi va yana Angliyaga qaytdi. Bu safar —“Vest Bromvich”ga. Boshqa mamlakatlardan Premyer Ligaga qaytishlar soni bo‘yicha haqiqiy afsona. 

Muhammad Saloh

“Liverpul”ga o‘tganidan so‘ng misrlik futbolchi Sky Sports News nashriga shunday degan edi:

“Men har doim Premyer Ligaga qaytishni va birinchi marta [Chelsida] muvaffaqiyatga erisha olmaganimni aytganlarga hammasini isbotlashni o‘ylardim. Men har doim APLda o‘ynash haqida o‘ylaganman”.

Ikki yil davomida London jamoasida o‘ynagan futbolchining o‘yini kutilganidek chiqmadi. Shundan so‘ng futbolchi “Fiorentina” va “Roma” klublarida o‘ynadi.

2017-yilda “Liverpul”ga qaytgan futbolchi hozirgacha 253 uchrashuvda 157 ta golga mualliflik qildi va klubning eng yaxshi hujumchisiga aylandi.

Jo Koul
“Chelsi”dagi ajoyib faoliyatidan so‘ng Koul “Liverpul”ga o‘tdi, ammo transfer uning uchun unchalik muvaffaqiyatli bo‘lmadi.

“Liverpul” bilan bor-yo‘g‘i bir yil o‘ynagach, u 2011/12-yilgi mavsumda “Lill”ga ijaraga berildi. Shundan so‘ng u “Vest Hem”ga qaytdi. Keyin esa futbolchi “Aston Villa”da ham o‘ynadi.

Maykl Ouen

Ko‘pchilik “Real Madrid”ga ko‘chib o‘tgan Ouenning qobiliyatiga shubha bilan qaraydi. Ammo futbolchi zaxiradan tushishiga qaramay “qirollik klubi”da La Ligada 13 ta gol urishga muvaffaq bo‘lgan.

Ispaniyadagi muvaffaqiyatsizlikka qaramay, 2005-yil yozgi transfer oynasida “Nyukasl”ga ko‘chib o‘tdi. Klub “Oltin to‘p” sohibiga katta umid bildirdi. Futbolchi keyinchalik “Manchester Yunayted” va “Stok Siti” klublarida o‘ynagan va 2013-yilda faoliyatini tugatdi.

Jimmi Floyd Xasselbank

Futbolchi ikki yil davomida “Lids Yunayted”da o‘ynadi. Ammo Jimmi yangi shartnomada juda katta maosh talab qildi va aynan shu sabab bilan klubni tark etdi. Futbolchi “Atletiko Madrid”ga ko‘chib o‘tdi va transferni yakunladi va Ispaniyada ajoyib mavsum o‘tkazdi va La Ligada 24 ta gol urdi.

Bu esa “Chelsi”ning e’tiborini tortdi va Floyd Xasselbank yana Angliyaga qaytdi. Futbolchi “Midlsbro”, “Charlton” va “Kardiff Siti” klublarida o‘ynashdan oldn “aristokratlar” safida 177 uchrashuvda 87 ta gol urdi.

Robbi Kin

Kin “Koventri Siti” safida Premyer Ligada bor-yo‘g‘i bir mavsum o‘ynadi va “Inter”ga o‘tib, Marchelo Lippi qo‘l ostida o‘ynadi. Ammo Lippining o‘rniga Marko Tardelli kelishi bilan uning “San-Siro”dagi muvaffaqiyatli faoliyati yakuniga yetdi. Yangi murabbiy qo‘l ostida bor-yo‘g‘i 14 ta o‘yin o‘tkazgan irlandiyalik futbolchi Angliyaga “Lids Yunayted”ga qaytib keldi. Avvaliga ijaraga kelgan futbolchi 2001-yilning may oyida Angliyaga to‘liq ko‘chib o‘tdi. Irlandiya termasining sobiq futbolchisi “Liverpul”, “Vest Xem” va “Aston Villa” klublarida ham to‘p surgan, biroq “Tottenhem”dagi faoliyati bilan esda qolgan.

Erkin G‘aybullayev tarjimasi