Buyuk Britaniya va Fransiya Ukrainadagi urushni to‘xtatish bo‘yicha o‘z rejasini tayyorlayotgan edi. Fransiya prezidenti Emmanuel Makron uning mazmunini oshkor qildi. Bu haqda Le Figaro xabar berdi.
Mazkur reja tayyor bo‘lganidan so‘ng AQSH hukumatiga ham taqdim etiladi. reja Rossiya va Ukraina o‘rtasida bir oy muddatga qisman sulh joriy etishni taklif qiladi. Biroq bu quruqlikdagi jangovar harakatlarga taalluqli bo‘lmaydi. Fransiya prezidenti buning sababini quyidagicha izohlamoqda.
O‘t ochish to‘xtatilgan taqdirda, front bo‘ylab unga rioya qilinayotganini tekshirish juda qiyin bo‘ladi, dedi Makron.
Siyosatchining so‘zlariga ko‘ra, qisman yarashuv havo va dengiz hujumlariga, jumladan, energetika obyektlariga zarba berishga taalluqli bo‘ladi.
Rejaning ikkinchi qismida Yevropa davlatlari Ukrainaga tinchlikparvar kontingent yuborishi ko‘zda tutilgan, ammo bu faqat keyingi bosqichda sodir bo‘ladi.
Yaqin haftalarda Ukraina tuprog‘ida Yevropa qo‘shinlari bo‘lmaydi. Gap shundaki, biz bu vaqtdan qanday qilib o‘t ochishni to‘xtatishga, bir necha hafta davom etadigan muzokaralarga, so‘ngra tinchlik imzolangandan keyin qo‘shinlarni joylashtirishga foydalanimish mumkin, dedi Makron.
Ukraina prezidenti Vladimir Zelenskiy Londonga tashrifi chog‘ida jurnalistlarning bu rejadan xabardormisiz, degan savoliga shunday javob berdi: “Men hamma narsadan xabardorman”.
Makron Fransiya va boshqa Yevropa davlatlari mudofaaga ko‘proq pul sarflashi kerakligini aytdi.
So‘nggi uch yil davomida ruslar mudofaaga YIMning 10 foizini sarflamoqda. Shuning uchun yalpi ichki mahsulotga nisbatan 3 yoki 3,5 foizlik chegarani belgilab, kelajakka tayyorgarlik ko‘rishimiz kerak. Bu Fransiya qiyinchilik bilan erishgan va Yevropaning ko‘plab davlatlari hali yaqinlashmagan 2 foizdan ancha farq qiladi, dedi u.
Buyuk Britaniya bosh vaziri Kir Starmer 2-mart kuni Buyuk Britaniya, Fransiya, shuningdek, ehtimol “yana bir yoki ikki davlat” harbiy harakatlarni to‘xtatish rejasi ustida ishlashini aytdi.
2-mart kuni Londonda Rossiya-Ukraina urushini hal qilishga bag‘ishlangan sammit bo‘lib o‘tdi. Unda Yevropa davlatlari, shuningdek, Turkiya va Kanada yetakchilari ishtirok etdi. Shuningdek, sammitda Ukraina prezidenti Volodimir Zelenskiy ham qatnashdi.
Zelenskiy va AQSH prezidenti Donald Tramp o‘rtasida 28-fevral kuni Vashingtondagi Oq uyda janjal kelib chiqdi, shundan so‘ng Ukraina rahbaridan prezident ma’muriyati binosini tark etishni so‘rashdi. Foydali qazilmalar to‘g‘risidagi bitimning belgilangan imzolanishi esa bekor qilindi.
Izoh (0)