Ukraina prezidenti Vladimir Zelenskiy “tinchlik o‘rnatish uchun zarur qadamlar”ni aytdi va ularni amalga oshirishga tayyorligini bildirdi. Bu haqda siyosatchi Yevropa kengashi yig‘ilishida ma’lum qildi.
Hamma ishonch hosil qilishi zarurki, Rossiya bu urushning yagona manbai sifatida uni tugatish zarurligini tan oladi. Buni ikki turdagi tinchlik bilan isbotlash mumkin: energiya va boshqa fuqarolik infratuzilmasiga hujumlarning to‘xtatilishi — raketalar, bombalar va uzoq masofali dronlardan foydalanish bo‘yicha o‘t ochishni to‘xtatish. Ikkinchisi esa dengizdagi sulh, ya’ni Qora dengizda harbiy operatsiyalarni to‘xtatish, dedi Zelenskiy.
Keyingi qadam sifatida u “muzokaralar qanday sharoitda o‘tayotganiga ishonch”, ya’ni rossiyaliklar aldamayotganiga ishonch hosil qilish zarurligini ta’kidladi. Ukraina prezidenti bu ishonchni mustahkamlash vositalaridan biri sifatida asirlarni ozod qilish bo‘lishi mumkinligini aytdi.
Shuni tushunish kerakki, har qanday sulh va ishonchni mustahkamlash bo‘yicha har qanday chora-tadbirlar faqat to‘liq va adolatli kelishuvga, xavfsizlik kafolatlari va urushni to‘xtatish bo‘yicha keng qamrovli bitimga kirish uchun muqaddima bo‘lishi mumkin, dedi u.
Zelenskiy Ukraina Yevropa bilan tinchlik rejasi va muzokaralar jarayonining barcha tafsilotlarini baham ko‘rishiga ishontirdi. Uning ta’kidlashicha, tinchlikka erishish jarayoniga Ukrainaga yordam berayotgan har bir davlat qo‘shilishi kerak.
Bundan tashqari, u Yevropani Ukraina xavfsizligi bilan bog‘liq har qanday masala Kiyev ishtirokida hal qilinishi kerak degan pozitsiyani qo‘llab-quvvatlashga chaqirdi.
Shuningdek, Zelenskiy Yevropa davlatlariga Ukrainaga yordam berishga qat’iy qaror qilgani uchun minnatdorlik bildirdi, Yevrokomissiyaning Yevropani qayta qurollantirish bo‘yicha sa’y-harakatlarini olqishlab, ularni “to‘g‘ri tashabbus” deb atadi va Ukrainada qurol ishlab chiqarish uchun mudofaa vositalarining katta qismini ajratishga chaqirdi.
Bizning sanoatimiz xavfsizlikka zamonaviy tahdidlarni hisobga olgan holda eng tezkor va dolzarbdir, dedi Zelenskiy.
Ukraina urush boshlangan ilk soniyadan boshlab tinchlikka intilib kelmoqda va biz har doim urushning davom etishining yagona sababi Rossiya ekanini aytganmiz. Ukraina nafaqat tinchlik yo‘lida zarur qadamlarni tashlashga tayyor, balki bu qadamlar qanday bo‘lishi kerakligini ham taklif qilmoqda. Shu bois sizlardan bizni qo‘llab-quvvatlashingizni so‘rayman — Ukrainani va tinchlik yo‘lini ochishga yordam berayotgan yevropalik yetakchilarni qo‘llab-quvvatlang, deya xulosa qildi siyosatchi.
Izoh (0)