Amerika Urushni o‘rganish instituti (ISW) AQSHning Ukrainaga harbiy yordamni to‘xtatishi qanday oqibatlarga olib kelishini prognoz qildi.
Tahlilchilar fikricha, bu Rossiya agressiyasining kuchayishiga, yangi hududlarni egallab olishga va butun mintaqani beqarorlashtirishga olib kelishi mumkin. Ukraina armiyasining jangovar qobiliyatiga sezilarli putur yetishi kutilmoqda.
AQSHning Ukraina mudofaa sanoatini mustahkamlashga qaratilgan harbiy va moliyaviy yordamini to‘xtatish urush muvozanatini o‘zgartirishi va Rossiyaga jang maydonida sezilarli ustunlik berishi mumkin, bu esa Moskvaning g‘alaba qozonish ehtimolini oshiradi, deyiladi ISW hisobotida.
Vashingtonda qurol-yarog‘ yetkazib berish davom ettirilmasa, Ukraina armiyasi qiyin ahvolga tushib qolishi bir necha bor ta’kidlangan. Hozirda AQSHdagi siyosiy kelishmovchiliklar, prezident Vladimir Zelenskiyning Donald Tramp bilan ziddiyati Kiyevga yangi yordam paketini ma’qullashga to‘sqinlik qilmoqda.
Ushbu bayonotlar fonida ekspertlar agar Ukrainani harbiy qo‘llab-quvvatlash to‘xtatilsa, oqibatlar nafaqat Kiyev, balki butun Yevropa xavfsizlik tizimi uchun jiddiy bo‘lishidan ogohlantirmoqda.
Ukrainaga yordam darhol bekor qilinishi mumkin
AQSHning Ukrainaga ko‘rsatgan barcha yordami, jumladan, Jo Bayden prezidentligi davrida ruxsat berilgan, to‘langan o‘q-dorilar va jihozlar yetkazib berish darhol bekor qilinishi mumkin. Bu haqda Tramp ma’muriyati rasmiy vakili The New York Times gazetasiga ma’lum qildi.
Pentagon ma’lumotlariga ko‘ra, Mudofaa vazirligi zaxiralaridan Kongress ajratishga ruxsat bergan mablag‘lardan taxminan 3,85 milliard dollar qolgan. Ukraina AQSH mudofaa kompaniyalaridan sotib olgan qurollarning so‘nggi partiyasi kelgusi olti oy ichida jo‘natilishi kutilmoqda. Shundan so‘ng Yevropaning o‘zi Ukrainani qo‘llab-quvvatlashga majbur bo‘ladi.
Oval kabinetdagi janjaldan so‘ng, Tramp ma’muriyati vakili prezident AQSH tomonidan ko‘rsatilayotgan bilvosita yordamni ham to‘xtatishga qaror qilishi mumkinligini ma’lum qildi. Bu yordam boshqa turdagi harbiy moliyalashtirish, razvedka ma’lumotlarini almashish, ukrainalik harbiylar va uchuvchilarni o‘qitish hamda Germaniyadagi AQSH harbiy bazasida xalqaro yordamni boshqaradigan aloqa markazini joylashtirish kabi yordamlarni o‘z ichiga oladi.
Bunday harakatlar og‘ir ahvolda qolgan hamkor davlatdan hayratlanarli darajada voz kechish bo‘lib, qo‘llab-quvvatlashning tugashini anglatadi, deya ta’kidladi nashr.
Izoh (0)