AQSH prezidenti Donald Trampning Ukrainada prezidentlik saylovlarini o‘tkazish zarurligi haqidagi bayonotlari uning Vladimir Zelenskiydan qutulishni istayotganidan dalolat bermoqda, deb yozmoqda Britaniyaning The Economist jurnali manbalarga tayanib.
Tramp, chamasi, o‘zi hech qachon yoqtirmagan va murakkab shaxs deb hisoblagan Zelenskiydan qutulmoqchi. Gap saylovlar haqida emas, balki Zelenskiydan qutulish haqida ketmoqda, deya ta’kidlaydi nashr suhbatdoshi.
Nashrda yozilishicha, nazariy jihatdan Ukraina Trampning Rossiya bilan tinchlik muzokaralari haqidagi taklifini rad etib, jangovar harakatlarni davom ettirishi mumkin, ammo amalda voqealarning bunday rivojlanishi Kiyevning ahvoli tez orada yomonlashishiga olib keladi.
Ukraina armiyasida operativ darajada jiddiy muammolar mavjud va strategik rejalashtirish deyarli yo‘q, oldingi chiziqdagi bo‘linmalarda shaxsiy tarkib keskin yetishmaydi, ba’zi brigadalar soni odatdagi sonining uchdan biridan ham kamroqqa qisqargan, deyiladi xabarda.
Jurnalning baholashicha, Trampda Ukrainaga ta’sir o‘tkazish uchun ko‘plab dastaklar mavjud – u Rossiyadan sanksiyalarni bir tomonlama bekor qilishi va ehtimol Kiyevga harbiy yordamni qisqartirishi yoki butunlay to‘xtatishi mumkin. Bundan tashqari, Tramp AQSHdan razvedka ma’lumotlari oqimini to‘xtatishi va Ukraina armiyasi bo‘linmalarining o‘zaro aloqasi uchun asos bo‘lgan Starlink sun’iy yo‘ldosh terminallarini o‘chirib qo‘yishi mumkin.
Avvalroq Tramp, agar Kiyev kelishuv bo‘yicha muzokaralar stolida o‘rin olishni istasa, Ukraina prezidentlik saylovlarini o‘tkazishi kerakligini aytgandi.
Tramp Zelenskiyni “saylovsiz diktator” deb atadi
Saylovsiz diktator. Zelenskiy tezroq harakat qilishi kerak, aks holda uning mamlakati butkul tamom bo‘ladi. Biz Rossiya bilan urushni tugatish bo‘yicha muzokaralarni muvaffaqiyatli olib bormoqdamiz. Buni faqat Tramp va uning ma’muriyati uddalay olishini barcha e’tirof etdi, deydi AQSH yetakchisi.
U “Ukrainani yaxshi ko‘rishi, biroq Zelenskiy juda yomon ish qilgani sababli uning mamlakati vayron bo‘lgani va millionlab odamlar sababsiz halok bo‘lgani”ni qo‘shimcha qildi.
Trampning ta’kidlashicha, Zelenskiy AQSHni “hech qachon boshlanmasligi kerak bo‘lgan, g‘alaba qozonib bo‘lmaydigan urush uchun” 350 milliard dollar ajratishga ko‘ndira olgan. Ukraina prezidenti Vashington Kiyevga go‘yoki 500 milliard dollarlik yordam bergani haqidagi ma’lumotlar haqiqatga to‘g‘ri kelmasligini aytdi.
Zelenskiy o‘z reytingining 4 foizga tushgani haqidagi ma’lumotlarni dezinformatsiya deb atadi va uni davlat rahbari lavozimidan hozir almashtirib bo‘lmasligini aytdi.
Ukrainada prezidentlik saylovlari 2024-yil mart oyida bo‘lib o‘tishi kerak edi. Zelenskiyning vakolatlari o‘sha yilning 20-mayidan keyin rasman tugadi. Shu bilan birga, uning o‘zi qonuniylik masalasi uni tashvishga solmasligini aytdi.
Izoh (0)