Turkiya tashqi ishlar vaziri Hoqon Fidan Anqaraning Ukrainaning NATOga a’zo bo‘lishi masalasiga pragmatik yondashuvni saqlab qolayotganini ma’lum qildi.
Ukrainaning NATOga a’zo bo‘lish istagiga qarshi emasmiz, biroq realist bo‘lishimiz lozim. Bu prezidentimiz Rajab Toyyib Erdo‘g‘on tomonidan bildirilgan rasmiy nuqtayi nazardir, deya ta’kidladi vazir Amerikaning Bloomberg telekanaliga bergan intervyusida.
Amerika yetakchisi Donald Tramp mamlakatning Ukrainaning alyansga a’zo bo‘lishiga munosabatini o‘zgartira oladimi, degan savolga javob berar ekan, Fidan hatto AQSHning avvalgi ma’muriyati ham bu jarayonni to‘liq qo‘llab-quvvatlaganiga shubha bildirdi.
Qo‘shma Shtatlarning avvalgi rahbariyati Ukrainaning NATOga qo‘shilishini chindan ham qo‘llab-quvvatlaganiga ishonchim komil emas. Shu bois hozir bu masalada yangi siyosat paydo bo‘ldi, deb o‘ylamayman, dedi u.
Vazir, shuningdek, Turkiya bu masalani yevropalik hamkorlari va Kiyev bilan muhokama qilayotganini ta’kidladi.
Ukraina bunga nafaqat rasmiy a’zolik uchun, balki o‘z xavfsizligini kafolatlash maqsadida intilayotganini tushunish muhim, deya qo‘shimcha qildi u.
Fevral oyi boshida Zelenskiy agar Ukrainani NATOga qabul qilishmasa, unda mamlakatda 1,5 million kishilik armiya, armiyada esa “zamonaviy qurollar” bo‘lishi kerakligini aytgan edi.
Uning so‘zlariga ko‘ra, “bugungi Amerika va prezident Tramp Ukrainaning NATOga kirishi haqida gapirishga tayyor emas”.
Ular ruslar bilan eskalatsiya sababli Ukrainada NATO bo‘lishi mumkin emas deb hisoblashadi, deya qo‘shimcha qildi Zelenskiy.
Zelenskiy “AQSHda tayyor reja borligini” ko‘rmayotganini qo‘shimcha qildi.
Biz hamma narsa haqida gapirishga tayyormiz. Kontingentdan xavfsizlik kafolatigacha. Biz har qanday konstruksiyaga tayyormiz, dedi Ukraina prezidenti.
13-fevral kuni AQSH prezidenti Donald Tramp Ukrainaning tinchlik kelishuvi doirasida NATOga kirishi “noreal” ekanligini ma’lum qildi.
AQSH prezidenti nima sababdan Rossiya Ukrainaga qarshi keng ko‘lamli urush boshlagani sababiga to‘xtalib o‘tgan edi. Trampning so‘zlariga ko‘ra, sobiq prezident Jo Bayden Ukrainaning NATOga a’zo bo‘lish istiqbollari haqida gapirgan. Bu esa go‘yoki “Rossiyani keng ko‘lamli harbiy bosqinni boshlashga undagan”. AQSH prezidenti rossiyaliklar o‘zlarining “mavqeyi” tufayli Ukrainaning NATOga to‘laqonli a’zosi bo‘lishiga “yo‘l qo‘ya olmasligi”ni aytdi. Biroq qanday “mavqeyi” haqida gap ketayotganiga izoh bermagan.
Izoh (0)