AQSH prezidenti Donald Tramp Ukrainaga Rossiyaga qarshi mudofaa urushiga yordam berish uchun sarflangan “milliardlab dollarlar”ni qaytarib olishni rejalashtirmoqda.
Men Ukraina tomoni bizga sarflagan mablag‘larimiz evaziga biror narsa berishini xohlayman. Shu sababli biz nodir yer elementlari va neftni, qo‘limizdan kelgan barcha narsani so‘rayapmiz, dedi u.
Merilendda bo‘lib o‘tgan Konservativ siyosiy harakatlar konferensiyasida (CPAC) so‘zga chiqqan Tramp Yevropa davlatlari Ukrainaga kredit ko‘rinishida yordam berganini, Qo‘shma Shtatlar esa bunday qilmaganini, shuning uchun ularga ma’lum miqdorda kompensatsiya to‘lanishi kerakligini ta’kidladi.
Biz o‘z mablag‘larimizni qaytarib olmoqchimiz, bu shunchaki adolatsizlik, dedi AQSH rahbari.
Uning fikricha, Vashington va Kiyev foydali qazilmalar bo‘yicha “kelishuvga erishishga juda yaqin”.
Biz kelishuvga erishishga yaqinroq bo‘lishimiz kerak, chunki bu juda og‘ir vaziyat, deya qo‘shimcha qildi Tramp.
OAV: Zelenskiy hozircha AQSH bilan shartnoma imzolashga tayyor emas
Sky News telekanali prezident Vladimir Zelenskiy mamlakatning nodir yer elementlari konlarini o‘zlashtirish huquqini AQSHga berish to‘g‘risidagi bitimni hozirgi ko‘rinishida imzolashga tayyor emasligi haqida xabar bergandi.
Kelishuv hali imzolashga tayyor emas, bir qator muammoli masalalar bor va loyihaning hozirgi ko‘rinishida prezident uni qabul qilishga tayyor emas. Bugungi kundagi loyihalar kelishuvdagi sheriklikni aks ettirmaydi va faqat Ukrainaning bir tomonlama majburiyatlarini o‘z ichiga oladi, dedi ukrainalik manba.
AQSH milliy xavfsizlik bo‘yicha maslahatchisi Mayk Uolts esa kelishuv amalga oshishini aytdi.
Asosiy xulosa shuki, prezident Zelenskiy bu bitimni imzolaydi va siz buni juda yaqin kelajakda ko‘rasiz, dedi u Merilend shtatida o‘tkazilgan konferensiyada.
AQSH muzokarachilari Ukraina kelishuvga rozi bo‘lmagan taqdirda, uning Ilon Maskning hayotiy muhim Starlink sun’iy yo‘ldosh internet tizimiga kirishini cheklash imkoniyatini ko‘targani taxmin qilinmoqda.
The New York Times’ning yozishicha, Ukraina Qo‘shma Shtatlardan shartnomaning yangi variantini olgan, biroq undagi ba’zi shartlar 14-fevral kuni AQSH moliya vaziri Skott Bessent tomonidan Kiyevga olib kelingan avvalgi variantdan ham qattiqroq bo‘lgan.
Ukraina tomoni hozircha taklif qilingan shartlar asosida kelishuvga rozi bo‘lishi yoki bo‘lmasligini aytgani yo‘q. Oliy Rada spikeri Ruslan Stefanchukning ma’lum qilishicha, hukumat darajasidagi guruh 24-fevralda kelishuv ustida ishlashni boshlaydi va Ukraina Vashingtonga o‘z resurslariga kirish imkoniyatini berish evaziga aniq xavfsizlik kafolatlarini olishni istaydi.
Izoh (0)