AQSH harbiy yordamisiz Ukraina hozirgi sur’atda yozgacha jang qilish uchun yetarli qurol-aslahaga ega. Bu haqda G‘arbning sobiq va hozirgi amaldorlariga tayanib, The Wall Street Journal xabar berdi.
Pentagonning sobiq amaldori Selesta Uollanderning aytishicha, Jo Bayden ma’muriyati tomonidan so‘nggi oylarda yuborilgan yoki buyurtma qilingan yirik yetkazib berishlar Ukrainaga kamida yil o‘rtalarigacha yetishi kerak.
Harbiylarga dronlar yetkazib beruvchi Ukrainaning Come Back Alive tashkiloti katta tahlilchisi Nikolay Beleskovning fikricha, bu ketishda armiya “olti oy yoki bir yil” davomida bardosh berishi mumkin. Keyin esa Yevropa tomonidan zarur o‘q-dorilar ishlab chiqarilishiga umid qilishiga to‘g‘ri keladi.
Ukraina prezidenti Vladimir Zelenskiyning yordamchisi (ismi keltirilmagan) AQSHning harbiy yordamni to‘xtatishini “eng yomon ssenariy” deb baholadi. Bunday holda Ukraina o‘z harbiy ishlab chiqarishini kengaytirishi va Yevropa davlatlaridan ko‘proq yordam olishi kerak bo‘ladi.
AQSH tomonidan harbiy ta’minot to‘xtatilgan taqdirda, Kiyev o‘q-dorilarsiz qolishi va eng zamonaviy qurollardan foydalana olmasligi mumkin.
Ukrainada qurol ishlab chiqarish sur’ati
Hozirda Ukraina harbiy texnikaning qariyb 55 foizini ishlab chiqaradi yoki moliyalashtiradi. G‘arb amaldorining so‘zlariga ko‘ra, texnikaning 25 foizini Yevropa va 20 foizga yaqinini AQSH yetkazib beradi. Ammo Amerikaning ilg‘or havo hujumidan mudofaa tizimlari, “yer-yer” sinfidagi ballistik raketalari, navigatsiya tizimlari va uzoq masofali raketa artilleriyasini o‘z ichiga olgan ba’zi ta’minotlarini qisqa muddatda almashtirish amalda imkonsiz. Yevropa ularni yetarlicha yoki umuman ishlab chiqarmaydi.
Shunga qaramay, Yevropa taqchillikni to‘ldirishga harakat qilishga tayyorlanmoqda. 2024-yilda Yevropa Ittifoqi, Buyuk Britaniya va Norvegiya Ukrainaga jami 25 milliard dollarlik qurol va o‘q-dorilar yetkazib bergani, bu AQSH ta’minotidan ham ko‘proq ekani aytilmoqda.
Izoh (0)