Braziliya prezidenti Lula da Silva amerikalik hamkasbi Donald Tramp “dunyo imperatori bo‘lish uchun saylanmagani”ni ma’lum qildi. Bu haqda CNN xabar berdi.
Siyosatchi shu tariqa prezident Trampning bojlar solish bo‘yicha tahdidlariga javob qaytardi. AQSH prezidenti 1-avgustdan boshlab Braziliya tovarlariga 50 foizlik boj solinishini aytgandi. Shuningdek, mamlakat sobiq prezidenti Jair Bolsonaroga qarshi sud ishini to‘xtatishga chaqirgandi. Sudlanayotgan shaxs AQSHning amaldagi prezidenti va uning oilasi bilan yaqin aloqalarga ega.
Bolsonaru 2022-yilgi prezidentlik g‘alabasidan so‘ng Lulani ag‘darishga uringani uchun sudlanmoqda. Agar u davlat to‘ntarishini uyushtirishda aybdor deb topilsa, 40 yildan ortiq vaqtga qamalishi mumkin.
Braziliya prezidenti Tramp mamlakatning ichki savdo va sud ishlariga aralasha olmasligini ta’kidlagan. Shuningdek, AQSH tomonidan joriy etiladigan bojlarni “mantiqsiz” deb atagan.
Boj stavkasi nafaqat miqdori bilan, balki e’lon qilingan uslubi bilan ham meni hayratga soldi. Prezident Tramp AQSHni boshqarishga saylanganini, dunyo imperatori emasligini unutmasligi kerak... Braziliyada sud hokimiyati mustaqil. Prezidentning bu jarayonga hech qanday ta’siri yo‘q.
Braziliya o‘z manfaatlarini va Braziliya xalqining manfaatlarini himoya qilishi kerak, boshqalarning manfaatlarini emas. Braziliya unga majburlab qabul qildiriladigan hech narsani qabul qilmaydi. Biz muzokaralarni ma’qullaymiz, degan Lula.
Shuningdek, u Trampning AQSHda 6-yanvar voqealari chog‘ida qilgan harakatlariga ishora qilib, agar bu hodisalar Braziliyada sodir etilganida, Tramp sudlanishi muqarrar bo‘lishini ta’kidladi.
Agar Tramp braziliyalik bo‘lganida va Kapitoliy tepaligida sodir bo‘lgan voqeani amalga oshirganida, u ham Braziliyada sudlanardi. Ehtimol, u konstitutsiyani buzgan bo‘lardi. Adolatga ko‘ra, agar u buni Braziliyada qilgan bo‘lsa, u ham hibsga olinardi, degan Lula da Silva.
Prezidentning so‘zlariga ko‘ra, Bolsonaro shunchaki shaxs sifatida emas, balki “to‘ntarish uyushtirishga uringan amallari uchun” sud qilinmoqda.
Ma’lumot uchun, Tramp Braziliya BRIKSdagi faoliyatini davom ettirsa, bu mamlakatga nisbatan yuqori bojlar joriy etilishi mumkinligini aytgan. U ushbu blokni “G‘arbga qarshi yo‘naltirilgan” deb atab, BRIKS bilan hamkorlik qiluvchi har qanday davlatga iqtisodiy bosim o‘tkazish bilan tahdid qilgan edi.
Trampga qarshi Kapitoliyga hujum bo‘yicha ayblovlar
2021-yil 6-yanvar kuni Kapitoliy binosiga Donald Tramp tarafdorlari bostirib kirgan. Bu voqea Jo Baydenning saylovdagi g‘alabasini Kongress tomonidan tasdiqlash jarayonida yuz bergan va butun dunyo e’tiborini tortgan edi. 2023-yil avgustida Trampga quyidagi ayblovlar qo‘yilgan edi:
- AQSH hukumatini aldashga urinish;
- saylov natijalarini tasdiqlash jarayoniga to‘sqinlik qilish;
- saylovchilarning konstitutsiyaviy huquqlarini buzish;
- tergovni to‘sib qo‘yish va bu borada fitna uyushtirish.
Ayblov xulosasida Trampning harakatlari Kapitoliy tepaligidagi zo‘ravonliklarga bevosita turtki bo‘lgani ta’kidlangan. Biroq siyosatchi ikkinchi muddatga prezidentlikka saylangach, unga qarshi ayblovlar bekor qilingan.
BRIKS qanday tashkilot?
Izoh (0)