2025-yil 10-fevral kuni Ipak Yo‘li Banki O‘zbekistonda kichik va o‘rta biznesni qo‘llab-quvvatlash va rivojlantirish maqsadida Gollandiya tadbirkorlikni rivojlantirish banki – FMO dan 100 million AQSh dollari miqdorida kredit jalb qilish uchun bitim imzoladi.
Ushbu bitim bankka kichik va o‘rta biznes loyihalarini faol moliyalashtirish, energiya samaradorligini oshirish va qayta tiklanadigan energiya manbalarini rivojlantirishga qaratilgan tashabbuslarni qo‘llab-quvvatlash hamda mamlakatda yosh va ayol tadbirkorlar faoliyatini kengaytirish uchun mablag‘ ajratish imkonini beradi. Hamkorlik dasturi doirasida kredit mablag‘lari multi-valyuta shaklida taqdim etilib, qarzni AQSh dollari yoki milliy valyutada olish mumkin bo‘ladi.
“Biz 2013 yildan beri FMO mijozi bo‘lgan Ipak Yo‘li Banki uchun ushbu yangi uzoq muddatli investitsiya krediti bilan faxrlanamiz. Bank barqaror moliyalashtirish va moliyaviy inklyuziyaga yo‘naltirilgan strategik hamkor sifatida rivojlandi. Kredit ekologik loyihalar, yosh va ayol tadbirkorlarni moliyalashtirish uchun ishlatilishi FMOning tengsizlikni kamaytirish va iqlimni himoya qilish maqsadlariga mos keladi. Ipak Yo‘li Banki jamoasiga ajoyib hamkorlik uchun rahmat”, dedi Xeyb-Yan de Ruyter, FMO investitsiyalar bo‘limi hamrahbari.
“Ushbu kelishuv banklarimiz o‘rtasidagi hamkorlikni mustahkamlashda muhim qadam bo‘lib, yashil loyihalar va tengsizlikni kamaytirishga qaratilgan tashabbuslarni, shu jumladan mikrobiznes, yoshlar va ayollar boshchiligidagi kichik va o‘rta korxonalarni qo‘llab-quvvatlaydi. Bu resurslar yangi ish o‘rinlari yaratishga, ayniqsa yoshlar va ayollar rahbarligidagi bizneslarga yordam beradi”, dedi Saidabror Saydaxmedov, Ipak Yo‘li Banki boshqaruvi raisi.
Ipak Yo‘li Bankining FMO bilan hamkorligi 2013 yilda 13 million dollarlik kreditdan boshlangan edi. O‘shandan beri yetti kredit bitimi imzolandi va umumiy jalb qilingan mablag‘ 191 million dollarga yetdi.
FMO haqida
FMO – Gollandiya tadbirkorlikni rivojlantirish banki. Ijtimoiy ta’sirga yo‘naltirilgan yetakchi investor sifatida FMO rivojlanayotgan mamlakatlarda xususiy sektorning barqaror o‘sishini qo‘llab-quvvatlaydi. Kuchli xususiy sektor iqtisodiy va ijtimoiy rivojlanishga yordam beradi deb hisoblagan FMO 50 yildan ortiq tajribaga ega. Bank agrobiznes, oziq-ovqat va suv, energiya va moliyaviy institutlar kabi sohalarga e’tibor qaratadi. 85 dan ortiq mamlakatda 13 milliard evroga yaqin portfeli bilan FMO dunyodagi eng yirik ikki tomonlama xususiy sektor banklaridan biridir.
Qo‘shimcha ma’lumot: www.fmo.nl
Reklama huquqi asosida.
Izoh (0)