AQSH prezidentining milliy xavfsizlik bo‘yicha maslahatchisi Mayk Uolts Fox News telekanali efirida Qo‘shma Shtatlar Rossiya bilan o‘zaro munosabatlarga yangicha yondashuvni shakllantirayotganini bildirdi.
Biz Rossiya bilan munosabatlarimizni qayta ko‘rib chiqmoqdamiz. Birinchi qadam prezident Trampning Putin va Zelenskiy bilan suhbatlari, keyinchalik esa Ar-Riyodda bo‘lib o‘tgan muzokaralar bo‘ldi, dedi u.
Uoltsning qo‘shimcha qilishicha, Qo‘shma Shtatlar, shuningdek, “Amerika xalqi mamlakatga kiritilgan ulkan sarmoyalardan foyda olishi” uchun iqtisodiyot va muhim minerallar bo‘yicha Ukraina bilan hamkorlikni qanday yo‘lga qo‘yishini yangicha talqin qilmoqda.
Joriy yilning 18-fevral kuni Ar-Riyodda Rossiya va AQSH delegatsiyalarining uchrashuvi bo‘lib o‘tgan edi. Uning yakunlari bo‘yicha Rossiya prezidenti matbuot kotibi Dmitriy Peskov muzokaralarda munosabatlarni tiklash yo‘lida muhim qadam qo‘yilganini ma’lum qildi. Shu bilan birga, u ikki davlat o‘rtasidagi munosabatlarni normallashtirish uchun uzoq yo‘lni bosib o‘tish kerakligini ta’kidladi.
AQSH Davlat departamenti ham mustahkam tinchlikka erishish uchun birgina uchrashuv yetarli emasligini qayd etdi.
Avvalroq AQSH Rossiyani tajovuzkor urush uchun qoralovchi Ukrainaning BMTdagi rezolyutsiyasini to‘xtatishga harakat qilayotgani haqida xabar berilgan edi.
Shu bilan birga, AQSH prezidenti Donald Tramp ma’muriyati BMTning barcha a’zolarini rezolyutsiyaning Amerika matnini qo‘llab-quvvatlashga chaqirdi.
Qo‘shma Shtatlar BMTga tinchlikka erishish yo‘lini belgilash uchun barcha a’zo davlatlarni qo‘llab-quvvatlashga undaydigan oddiy tarixiy rezolyutsiyani taklif etdi, deya AQSH Davlat departamenti ma’lum qildi.
Ta’kidlanishicha, ushbu rezolyutsiya prezident Trampning BMT o‘zining Nizomida mustahkamlangan asosiy maqsadiga — xalqaro tinchlik va xavfsizlikni, jumladan, nizolarni tinch yo‘l bilan hal etish orqali ta’minlashga qaytishi kerakligi haqidagi fikriga muvofiqdir.
Biz qat’iy ishonamizki, hozir urushni to‘xtatish bo‘yicha majburiyatlarni zimmaga olish vaqti keldi. Bu tinchlikka erishish uchun haqiqiy turtki yaratish imkoniyatimizdir, deyiladi bayonotda.
AQSH rezolyutsiyasi loyihasida Ukraina suvereniteti tamoyillariga havolalar yo‘q
Bloomberg’ga ko‘ra, Amerika rezolyutsiya loyihasida Ukraina suvereniteti va hududiy yaxlitligi tamoyillariga havolalar mavjud emas. The Washington Post xabariga ko‘ra, Ukrainaga Amerika tomonining taklifi haqida 21-fevral kuni xabar berilgan.
Nashr suhbatdoshining aniqlashtirishicha, dastlab Vashington Ukraina tomonidan taklif qilingan rezolyutsiyani ko‘rib chiqqan va “uni yumshatish uchun ba’zi o‘zgartirishlar kiritishni talab qilgan”. Keyin Vashington yangi rezolyutsiyani taklif qilib, Kiyevni o‘z variantini qaytarib olishga chaqirgan. Ukraina prezidenti Vladimir Zelenskiy esa Ukraina TIVga rezolyutsiyani qaytarib olmaslikni buyurgan.
Rossiya AQSH hujjatiga tuzatish kiritilgan taqdirda, uni qo‘llab-quvvatlashga tayyor
AFP agentligining ma’lumotlariga ko‘ra, AQSH tomonidan ilgari surilgan loyihada Ukrainaning Rossiya tomonidan bosib olingan hududi haqida hech qanday eslatma yo‘q. Vashington tomonidan ilgari surilgan va qo‘llab-quvvatlangan avvalgi rezolyutsiyalardan farqli o‘laroq, so‘nggi loyihada Moskvaga nisbatan tanqid mavjud emas va u mojaro manbai sifatida ko‘rsatilmagan.
Rossiya “mojaroga tezroq barham berishga chaqiradi” so‘zlaridan keyin “shu jumladan, uning asosiy sabablarini bartaraf etish orqali” iborasini qo‘shib, hujjatga tuzatish kiritishni taklif qildi, deb ta’kidladi Reuters.
Rossiyaning BMTdagi doimiy vakili Vasiliy Nebenzya esa Amerika loyihasini “yaxshi qadam” deb atadi. Rossiyalik anonim diplomatga ko‘ra, agar bu tuzatish BMT Bosh Assambleyasi tomonidan qabul qilinsa, Moskva AQSH rezolyutsiyasi uchun ovoz beradi.
Izoh (0)