Rossiya Xavfsizlik kengashi raisi o‘rinbosari Dmitriy Medvedev Ukrainani “amerikaliklar oyog‘iga yiqilish”, mamlakatda prezidentlik saylovlari o‘tkazish va taslim bo‘lishga tayyorlanishga chaqirdi.
Medvedevning so‘zlariga ko‘ra, bu AQSH prezidenti Donald Tramp hokimiyatga kelganidan keyingi Ukraina uchun chiqish yo‘llardan biridir. U Ukraina prezidenti “Trampni o‘zining hiyla-nayranglari bilan bezdirib qo‘ygan”ini da’vo qildi.
Ularning ikki yo‘li bor. Birinchisi: amerikaliklarning oyog‘iga yiqilish, zudlik bilan saylov e’lon qilish va urushning yoqimsiz yakuniga tayyorgarlik ko‘rish. Mohiyatan — taslim bo‘lish, dedi u.
Medvedev Ukraina rahbariyati tomonidan “allaqachon sinovdan o‘tgan” ikkinchi yo‘l “o‘zi bilan murosa qilib tinchlanish” ekanini ta’kidladi.
Tramp 3-fevral kuni Ukrainaga nodir metallar evaziga AQSHdan yordam olishni taklif qildi. Bu guruhga 17 ta element: skandiy, ittriy, lantan va boshqalar kiradi. Keyinchalik u kelishuv hajmini 500 million dollarga baholab, nodir metallar va gazga ega bo‘lish evaziga Vashington Ukrainaga har qanday ehtimoliy tinchlik kelishuvida xavfsizlik kafolatlarini berishini ta’kidladi. Oq uyning tushuntirishicha, AQSH Kiyevni qo‘llab-quvvatlash uchun sarflangan mablag‘larni qoplash uchun Ukrainadan nodir metallarni olish niyatida.
Zelenskiyga ko‘ra, Ukraina o‘z resurslarini AQSH bilan bepul bo‘lishmoqchi emas, biroq foydali qazilmalarni birgalikda o‘zlashtirish mumkin bo‘lgan kelishuvga tayyor. U buni “amerikaliklar hammadan ko‘p yordam bergani” bilan izohladi. Ammo Zelenskiy hujjatni imzolashdan bosh tortdi. AQSH Ukrainaga foydali qazilmalar bo‘yicha bitimning yangi versiyasini topshirdi. Ukraina rahbari maslahatchilari prezidentdan uni imzolashni, Tramp bilan “yangi kelishmovchilikka bormaslik”ni tavsiya qilgandi.
Izoh (0)