Rossiya prezidenti Vladimir Putin o‘z mamlakatidagi nodir yer metallarini qazib olish bo‘yicha AQSH bilan hamkorlik qilmoqchi. U ikki mamlakat birgalikda alyuminiy ishlab chiqarishi mumkinligini ham aytdi. Bu haqda Kreml xabar berdi.
Biz Amerika kompaniyalar bilan ushbu yo‘nalishda hamkorlik qilish haqida o‘ylashimiz mumkin. Masalan, Krasnoyarsk o‘lkasida sovet davrida yangi gidroelektr stansiyasi qurish va qo‘shimcha alyuminiy ishlab chiqarish korxonalarini tashkil etish rejalari mavjud edi, dedi Putin.
U bu loyiha “investitsion salohiyatga ega” bo‘lishi mumkinligini ta’kidladi.
Dastlabki hisob-kitoblarga ko‘ra, u bugungi narxlarda taxminan 15 milliard dollarga baholanadi yoki baholanishi mumkin. Lekin biz bu haqda o‘ylab ko‘rishimiz kerak, deya ta’kidladi Rossiya rahbari.
Rossiya hududidagi nodir yer metallari haqida gapirar ekan, Putin bugungi kunda mamlakat ularni o‘zlashtirish uchun yetarlicha ish qilmayotganini aytdi.
Nodir yer metallari — zamonaviy iqtisodiyot tarmoqlari uchun juda muhim komponent, g‘oyat muhim resurslardir. Biz hozircha bu yo‘nalishda kam ish qilyapmiz. Ko‘proq qilishimiz kerak, dedi u.
Avvalroq AQSH prezidenti Donald Tramp Rossiyada Vashington manfaatdor bo‘lgan resurslar, jumladan, nodir metallar borligini aytgan edi.
Putinning so‘zlariga ko‘ra, Rossiya yerosti metallarini qazib olishga xorijiy hamkorlarni, jumladan, AQSHni ham jalb qilishga tayyor. U Rossiyada bunday elementlar Ukrainadagiga qaraganda ancha ko‘pligini ta’kidladi. Shuningdek, Putin AQSHga ikki million tonna alyuminiy yetkazib berishga tayyorligini aytdi.
Rossiya prezidenti bunday choralar “narxlarni barqarorlashtirishi”ni qayd etdi. Rossiyalik siyosatchining fikricha, Vashington va Moskva Krasnoyarsk o‘lkasida alyuminiy qazib olish bo‘yicha qo‘shma loyihalarni ishga tushirishi mumkin.
AQSH Ukrainadagi metallarni qazib olish bo‘yicha bitim imzolamoqchi
11-fevral kuni AQSH prezidenti harbiy yordam evaziga Ukraina AQSHga o‘z hududida qimmatbaho minerallarni qazib olishga ruxsat berishga “deyarli rozi bo‘lganini” aytgan edi. 15-fevral kuni Tramp ma’muriyati Ukrainaga mamlakatning nodir yerosti boyliklariga egalik huquqining 50 foizini AQSHga berishni taklif qilgani ma’lum bo‘ldi.
Ammo Vladimir Zelenskiy hujjatni imzolashdan bosh tortdi, chunki kelishuv loyihasida “bir qator muammoli masalalar” bor va u UKraina manfaatlarini aks ettirmaydi. AQSH Ukrainaga foydali qazilmalar bo‘yicha bitimning yangi versiyasini topshirgan. Ukraina rahbari maslahatchilari prezidentdan uni imzolashni, Tramp bilan “yangi kelishmovchilikka bormaslik”ni tavsiya qilgandi. Biroq Zelenskiy “ukrainaliklarning 10 avlodi to‘laydigan hujjatni” imzolamasligini qayd etgan. Ukraina prezidenti AQSH bilan Ukraina mineral resurslari bo‘yicha bitim tuzish muhokama bosqichida ekanini aytdi. U Kiyevni qoniqtirmagan hujjatning bir nechta variant ko‘rib chiqilganini ta’kidladi.
Izoh (0)