Ukraina prezidenti Vladimir Zelenskiy 20-fevral kuni Kiyevda AQSH prezidentining Ukraina va Rossiya masalalari bo‘yicha maxsus vakili Kit Kellog bilan uchrashdi. Bu haqda u o‘zining Telegram kanalida xabar berdi.
Uchrashuvdan so‘ng taklif etilgan jurnalistlar siyosatchilarning matbuotga murojaat qilishini kutishgan, biroq bu sodir bo‘lmadi.
Amerika tomonining iltimosiga ko‘ra, tadbir formati faqat protokol suratga olishdan iborat. Bayonotlar, savollar va javoblar rejalashtirilmagan, dedi Zelenskiyning matbuot kotibi Sergey Nikiforov.
Zelenskiy uchrashuv haqida
Prezidentning aytishicha, ular “ko‘plab tafsilotlarni o‘z ichiga olgan yaxshi suhbat” o‘tkazgan. Tomonlar jang maydonidagi vaziyat, asirlarni qaytarish va xavfsizlik kafolatlari haqida batafsil fikr almashgan. Ukraina prezidenti Tramp bilan “chindan ham foydali” kelishuv tuzishga tayyorligini ma’lum qilgan.
Ukraina ushbu urushning dastlabki soniyalaridanoq tinchlikka intilmoqda va biz tinchlikni ishonchli hamda uzoq muddatli qilishimiz mumkin va shunday qilishimiz kerak, toki Rossiya qaytib urush boshlay olmasin. Ukraina AQSH prezidenti bilan investitsiyalar va xavfsizlik bo‘yicha kuchli, haqiqatda foydali kelishuvga tayyordir. Biz natijalarga erishishning eng tez va konstruktiv usulini taklif qildik. Bizning jamoamiz 24/7 ishlashga tayyor, deydi Zelenskiy.
Tramp maxsus vakilining Ukrainaga tashrifi
Kit Kellog 19-fevral kuni ertalab uch kunlik tashrif bilan Kiyevga keldi. Shu kuni u Ukraina Qurolli kuchlari bosh qo‘mondoni general Aleksandr Sirskiy, Ukraina maxsus xizmatlari rahbarlari, shuningdek, Ukraina prezidenti ofisi rahbari Andrey Yermak tomonidan qabul qilindi.
20 fevral kuni Kellog bilan Ukraina tashqi ishlar vaziri Andrey Sibiga uchrashdi. TIV rahbarining so‘zlariga ko‘ra, uchrashuvda tomonlar keng qamrovli, adolatli va mustahkam tinchlikka erishish yo‘llarini muhokama qilgan.
“Men Ukrainaning kuch bilan tinchlikka erishishga tayyorligini va zarur qadamlarni ko‘rishimizni tasdiqladim. Shuningdek, men Ukraina va transatlantika xavfsizligi bo‘linmas ekanligini takrorladim”, dedi u X ijtimoiy tarmog‘ida.
Tramp Zelenskiyni “saylovlarsiz diktator” deb atadi
Saylovsiz diktator. Zelenskiy tezroq harakat qilishi kerak, aks holda uning mamlakati butkul tamom bo‘ladi. Biz Rossiya bilan urushni tugatish bo‘yicha muzokaralarni muvaffaqiyatli olib bormoqdamiz. Buni faqat Tramp va uning ma’muriyati uddalay olishini barcha e’tirof etdi, deydi AQSH yetakchisi.
U “Ukrainani yaxshi ko‘rishi, biroq Zelenskiy juda yomon ish qilgani sababli uning mamlakati vayron bo‘lgani va millionlab odamlar sababsiz halok bo‘lgani”ni qo‘shimcha qildi.
Trampning ta’kidlashicha, Zelenskiy AQSHni “hech qachon boshlanmasligi kerak bo‘lgan, g‘alaba qozonib bo‘lmaydigan urush uchun” 350 milliard dollar ajratishga ko‘ndira olgan. Ukraina prezidenti Vashington Kiyevga go‘yoki 500 milliard dollarlik yordam bergani haqidagi ma’lumotlar haqiqatga to‘g‘ri kelmasligini aytdi.
Ukraina TIV munosabati
Tashqi ishlar vaziri Andrey Sibiga AQSH prezidentining tahdidlariga javoba Ukraina Yevropa zamonaviy tarixidagi eng dahshatli harbiy hujumga va uch yillik to‘liq urushga bardosh berganini aytdi.
Ukraina xalqi va uning prezidenti Vladimir Zelenskiy Putinning bosimiga bo‘ysunishni rad etdi. Hech kim Ukrainani taslim bo‘lishga majburlay olmaydi. Biz o‘z mavjudlik huquqimizni himoya qilishda davom etamiz, deya ta’kidladi u.
Izoh (0)