Eron prezidenti Mas’ud Pezeshkiyon kortejidagi avtomobillarga suyultirilgan benzin quyilgani sababli taksiga o‘tirishga majbur bo‘ldi. Bu haqda NasrNews xabar berdi.
Prezidentning maxsus inspektori Mustafo Molaviyning aytishicha, voqea Pezeshkiyonning Tabrizga norasmiy tashrifi paytida yuz bergan. Kazvin viloyatidagi yonilg‘i quyish shoxobchasida prezident kortejidagi uchta avtomobilga suv aralashtirilgan benzin quyilgan. Natijada ular belgilangan manzilga yetib bora olmagan. Oqibatda prezident xususiy taksida Tabrizga yo‘l olishga majbur bo‘lgan.
Mas’ud Pezeshkiyon ushbu hodisaga javoban hech qanday rasmiy chora ko‘rmadi, aksincha xususiy taksida Tabrizga yo‘l oldi, deyiladi xabarda.
Fars nashrining xabar berishicha, 16-iyun kuni Pezeshkiyon Isroilning Tehronga uyushtirgan hujumi paytida yaralangan. U oyoqlaridan yengil jarohat olgan. Bu voqea Milliy xavfsizlik oliy kengashi yig‘ilishi vaqtida sodir bo‘lgan. Isroil harbiylari binoning kirish va chiqish yo‘llariga oltita bomba yoki raketa bilan zarba bergani aytilmoqda.
Shundan so‘ng prezident bo‘lgan binoda elektr ta’minoti uzilgan. Ammo amaldorlar binodan favqulodda lyuk orqali chiqib ketishga erishgan. Hujum Livanning “Hizbulloh” guruhi yetakchisi Hasan Nasrulloning o‘ldirilishi “andozasida” amalga oshirilgan. Isroil zarbani juda aniq ma’lumotlar asosida bergani sabab Eron ichki tergov olib bormoqda.
Izoh (0)