Saudiya Arabistonining Ar-Riyod shahrida katta professional boks kechasi bo‘lib o‘tdi. Kechaning markaziy jangi yarim og‘ir vazndagi mutlaq jahon chempioni Artur Beterbiyev va ushbu vazn toifasining sobiq jahon chempioni Dmitriy Bivol o‘rtasidagi revansh bo‘ldi. Hakamlarning bo‘lingan qaroriga ko‘ra ushbu jangda Bivol g‘alaba qozondi.
Dastlabki raundlarda bokschilar bir-birini o‘rgandi. Jangning o‘rtalariga kelib Beterbiyev tashabbusni o‘z qo‘liga oldi va Bivolning boshiga hamda tanasiga bir necha marta kuchli zarbalar yo‘lladi.
Yettinchi raunddan boshlab har ikkala bokschi ustunlikni qo‘lga olishga harakat qildi. Bivol ko‘p zarbali kombinatsiyalar bilan hujum qildi, ammo Beterbiyev ham o‘z navbatida aniq va kuchli zarbalar bilan javob qaytarib, muvozanatni tikladi.
So‘nggi – “chempionlik” raundlari ham juda keskin kurashda o‘tdi. Jang 12 raund davom etdi va hakamlar bokschilarni quyidagicha baholadi: 114-114, 116-112, 115-113 – Bivol foydasiga.
Shunday qilib, Dmitriy Bivol yarim og‘ir vazn toifasida mutlaq jahon chempioni bo‘ldi.
Ma’lumot uchun, Bivol va Beterbiyev o‘rtasidagi birinchi jang 2024-yil oktyabr oyida bo‘lib o‘tgandi va Beterbiyev hakamlar qaroriga ko‘ra g‘alaba qozonib, yarim og‘ir vazn toifasi (WBC, WBA) tarixida oltita chempionlik unvonini birlashtirgan ilk sportchiga aylangandi.
Ushbu musobaqa doirasida Isroil Madrimov ham jang qildi va hakamlar qaroriga ko‘ra Verjil Ortisga mag‘lub bo‘ldi.
Izoh (0)