Falastinning HAMAS harakati isroillik garovga olingan ayolning jasadi almashtirilgani sababini aniqlashga va’da berdi.
Isroil ma’lumotlariga ko‘ra, jasad Shiri Bibasga tegishli emas. HAMASga ko‘ra, Isroilning G‘azo sektoriga qilgan havo hujumidan so‘ng vayronalar ostidan topilgan jasadlar bilan “adashtirib yuborish” yuz bergan bo‘lishi mumkin.
HAMAS voqea tafsilotlarini aniqlash uchun tergov o‘tkazishni rejalashtirmoqda. Harakat o‘t ochishni to‘xtatish bo‘yicha o‘z majburiyatlariga “to‘liq sodiqligini” ta’kidladi.
AFP xabar berishicha, harakat bayonotida Netanyaxuning tahdidlarini rad etishini bildirgan. Avvalroq Isroil bosh vaziri “jangarilar kelishuvni shafqatsizlarcha va razilona buzgani uchun to‘liq haq to‘lash”ga chaqirgan edi.
Joriy yilning 20-fevral kuni HAMAS Qizil xochga 33 yoshli Shiri Bibas va uning o‘g‘illari (ikki yoshli Kfir va besh yoshli Ariel) hamda Nir-Oz kibutsidan 83 yoshida o‘g‘irlab ketilgan jurnalist Oded Lifshitsning jasadlarini topshirdi. Ekspertiza natijalariga ko‘ra, Isroil ayolning jasadi na Shiri Bibasga, na boshqa garovga olingan ayolga tegishli ekanligini ma’lum qildi.
2023-yil 7-oktyabrda HAMAS hujumida Kfir Bibas to‘qqiz oylik, akasi Ariel esa to‘rt yoshda bo‘lgan. Ularning otasi Yarden Bibas o‘sha kuni o‘g‘irlab ketilgan, biroq u oila a’zolaridan alohida ushlab turilgan va 2025-yil fevralda ozod etilgan.
HAMASga ko‘ra, ikki bola va ona Isroil aviazarbasi oqibatida halok bo‘lgan. Isroil bu talqinni rad etib, garovdagilar o‘limining haqiqiy sababini aniqlashga va’da berdi.
Izoh (0)