Isroil harbiylarining ta’kidlashicha, razvedka ma’lumotlari va sud-tibbiyot ekspertizasi 21-fevral kuni Isroilga qaytarilgan Bibasning o‘g‘illari HAMAS ta’kidlaganidek, Isroil havo hujumlaridan emas, balki qasddan o‘ldirilganini ko‘rsatgan.
Biz atigi 10 oylik chaqaloq Kfir Bibas va uning 4 yoshli akasi Ariel 2023-yil noyabr oyidayoq G‘azoda garovda ushlab turilganda terrorchilar tomonidan vahshiylarcha o‘ldirilganini tasdiqlay olamiz, deyiladi Isroil armiyasi matbuot kotibi kontr-admiral Daniel Hagariyning telemurojaatida.
Uning ta’kidlashicha, “HAMAS bolakaylarga o‘q uzmagan, ularni o‘z qo‘llari bilan o‘ldirgan”. Hagariy bolalarning otasi — yaqinda garovdan ozod qilingan Yarden Bibas bilan gaplashganini qo‘shimcha qildi.
Garovga olinganlar va bedarak yo‘qolganlar oilalari forumi bayonot berib, bolalarning o‘ldirilishini vahshiylik deb atadi.
Biz HAMAS tomonidan hali begunoh go‘daklar — Ariel va Kfir Bibaslarning shafqatsiz va vahshiylarcha o‘ldirilganini tasdiqlovchi dahshatli ma’lumotlardan chuqur ta’sirlandik, deyiladi guruh bayonotida.
HAMAS 21-fevral kuni birinchi marta garovga olinganlarning jasadlarini Isroilga topshirdi.
Taxminlarga ko‘ra, bu jasadlar HAMAS hujumi vaqtida 83 yoshda bo‘lgan faol va jurnalist Oded Lifshitsga va Bibas oilasining uch a’zosi — 32 yoshli Shiri Bibas va uning o‘g‘illari, 4 yoshli Ariel va 10 oylik Kfirga tegishli bo‘lgan.
Biroq Isroil harbiylarining ta’kidlashicha, ekspertiza faqat uch nafar halok bo‘lgan garovga olinganlarning shaxsini tasdiqlagan. Armiya HAMAS tomonidan topshirilgan to‘rtta jasaddan biri garovga olingan Shiri Bibas emas, balki noma’lum shaxsga tegishli ekanini ma’lum qildi.
Bu HAMAS tomonidan o‘ta shafqatsiz qoidabuzarlik bo‘lib, kelishuvga ko‘ra u to‘rt nafar halok bo‘lgan garovga olinganlarni qaytarishga majbur. Biz HAMASni Shiri Bibas va o‘g‘irlanganlarning barchasini qaytarishga chaqiramiz, dedi Isroil armiyasining arab tilida so‘zlashuvchi vakili Avichai Adrai.
Isroil va HAMAS o‘rtasidagi kelishuv garovga olinganlarni ozod qilish va qurbonlarning jasadlarini qat’iy ravishda oldindan tasdiqlangan ro‘yxatga muvofiq qaytarishni nazarda tutadi.
Kfir va Arielning onasi Shirini qaytarish o‘rniga, HAMAS hech narsaga arzimaydigan yuk kabi noma’lum jasadni qaytardi. Bu yangi tubanlik, yovuzlik va shafqatsizlik bo‘lib, bunga teng keladigani yo‘q, dedi Isroilning BMTdagi doimiy vakili Denni Danon.
HAMAS jasadlarni ommaviy namoyishda topshirgandi. Birlashgan Millatlar Tashkiloti bosh kotibi Antonio Guterrish buni qattiq qoraladi.
Izoh (0)