Falastinning HAMAS harakati garovga olingan barcha isroilliklarni bir vaqtning o‘zida ozod qilishga tayyorligini bildirdi, biroq shart qo‘ydi. Bu haqda Al Jazeera xabar berdi.
HAMAS G‘azo sektorida o‘t ochishni to‘xtatish bo‘yicha kelishuvning ikkinchi bosqichi bo‘yicha muzokaralar chog‘ida o‘z pozitsiyalarini bayon qildi.
Biz ikkinchi bosqichga tayyormiz. Bu bosqichda garovdagilar bir vaqtda ozod etiladi. Bu jarayon o‘t ochishni doimiy to‘xtatish va G‘azo sektoridan qo‘shinlarni to‘liq olib chiqish doirasida amalga oshiriladi, dedi HAMAS matbuot kotibi Hazem Qosim.
HAMASning yangi tashabbusi AQSH prezidenti Donald Tramp G‘azoda saqlanayotgan isroillik garovdagilarni har hafta bosqichma-bosqich ozod qilishga qarshi chiqqanidan keyin e’lon qilindi. HAMASga barcha garovga olinganlarni ozod qilish talabi bilan ularning oila a’zolari ham darhol murojaat qilishdi.
15-yanvar kuni Isroil va HAMAS G‘azoda garovga olinganlarni ozod qilish va anklavda o‘t ochishni to‘xtatish rejimini joriy etish bo‘yicha kelishuvga erishdi. Uchta bosqichni o‘z ichiga olgan kelishuv 19-yanvar kuni kuchga kirdi.
Birinchi bosqichni amalga oshirish 42 kun davom etdi, bu vaqt ichida HAMAS kamida 33 nafar isroillik garovga olinganlarni Isroil qamoqxonalarida saqlanayotgan falastinlik mahbuslar evaziga ozod qilishi kerak edi. Garovga olingan 19 kishi allaqachon Isroilga qaytarilgan. Kelishuvning ikkinchi va uchinchi bosqichlari bo‘yicha muzokaralar ketmoqda.
Izoh (0)