Isroilning Tel-Aviv janubidagi Bat-Yam shahrida 20-fevral kuni kechqurun avtoturargohda turgan uchta avtobus portlab ketdi. Yana ikkita portlovchi qurilma zararsizlantirildi. Bu haqda The Times of Israel xabar berdi.
Dastlabki ma’lumotlarga ko‘ra, halok bo‘lganlar va jabrlanganlar yo‘q. Bat-Yama ma’muriyati avtobuslar “portlashdan bir daqiqa oldin to‘xtash joyiga yetib kelganini” ma’lum qildi.
5 kilogrammdan portlovchi modda bo‘lgan barcha beshta bombaning taymerlari 21-fevral kuni ertalab bir vaqtning o‘zida ishga tushishi uchun dasturlashtirilgan, deyiladi xabarda.
Isroil xavfsizlik xizmatidagi manbaga ko‘ra, keyinroq politsiya Bat-Yam va Xolon shaharlaridagi avtobuslardan yana to‘rtta portlovchi qurilma topgan. Rasmiylar sodir bo‘lgan voqeani “strategik terakt” sodir etishga urinish deb hisoblamoqda. Tergovda Isroil mudofaa armiyasi umumiy xavfsizlik xizmati bilan birgalikda ishtirok etmoqda.
Isroil ommaviy axborot vositalarining xabar berishicha, kamida bitta ishlamagan portlovchi qurilmada “Tulkarmdan qasos” yozuvi topilgan — Iordan daryosining g‘arbiy sohilidagi shahar, u yerda Isroil armiyasi 21-yanvardan beri “Temir devor” nomi ostida keng ko‘lamli operatsiya o‘tkazmoqda.
Isroil bo‘ylab avtobus haydovchilariga sayohatni boshlashdan oldin avtobuslarni sinchkovlik bilan tekshirish buyurilgan. Ben-Gurion aeroportida xavfsizlik choralari kuchaytirilgan.
Isroil mudofaa vaziri Israel Katsning aytishicha, u allaqachon armiyaga “Tulkarm qochqinlar lagerida, shuningdek, Yahudiya va Samariyadagi barcha qochqinlar lagerlarida terrorizmga qarshi faollikni oshirish” buyrug‘ini bergan.
Izoh (0)