AQSH Senati Ukraina, Isroil va Tayvanga 95 milliard dollar miqdorida harbiy yordam ko‘rsatish haqidagi qarorni ma’qulladi. Bu haqda BBC xabar berdi.
Qonun loyihasiga ko‘ra, Isroil uchun 26 milliard dollar, Ukraina uchun 60,84 milliard dollar, shuningdek, “kommunistik Xitoyga qarshi turish” uchun 8,12 milliard dollar, jumladan, Tayvanni qo‘llab-quvvatlash uchun taxminan 2 milliard dollar ajratiladi.
Endilikda mazkur qaror kuchga kirishi uchun prezident Jo Bayden tomonidan imzolanishi kerak. Bayden Senatdagi ovoz berishdan so‘ng darhol hujjatlarni imzolashga va’da bergan, shundan so‘ng Ukrainaga harbiy yordamning birinchi partiyasi bir necha kun ichida yetkaziladi.
Paket to‘rtta qonun loyihasini o‘z ichiga oladi: Ukraina, Isroil va Tayvanga yordam va to‘rtinchi taklif TikTok’ni potensial taqiqlash va REPO qonuni. Oxirgi qonun Rossiyaning musodara qilingan aktivlarini sotishga ruxsat beradi.
AQSH Isroilga va G‘azo sektoriga gumanitar yordam ko‘rsatish uchun 26 milliard dollar, Tayvan va Hind-Tinch okeani mintaqasida xavfsizlikni ta’minlash uchun 8 milliard dollar ajratmoqda.
Ukraina prezidenti Vladimir Zelenskiy amerikalik senatorlarga qarori uchun minnatdorlik bildirgan.
“Mazkur ovoz berish jarayoni Amerikaning demokratiya mayog‘i va erkin dunyo yetakchisi sifatidagi rolini mustahkamlaydi. Shuningdek, men prezident Baydenning qo‘llab-quvvatlashini qadrlayman va qonun loyihasining tezda imzolanishini, navbatdagi harbiy yordam paketining yetkazilishini intiqlik bilan kutaman. Ukrainaning uzoq masofali qurollari, artilleriya, havo hujumidan mudofaa tizimi adolat va tinchlikni tezda tiklash uchun juda muhim vositadir”, — degan Zelenskiy.
Izoh (0)