O‘zbekiston Bosh konsulxonasi diplomatlari ko‘magida Sankt-Peterburg shahrida qiyin ahvolda qolgan vatandoshimiz oilasi bag‘riga qaytarildi. Bu haqda “Dunyo” AA xabar berdi.
Maʼlum qilinishicha, o‘zbekistonlik shaxs 2024-yilning iyulida Rossiyaga vaqtincha ishlash maqsadida kelgan. U Rossiya hududida qonuniy bo‘lish uchun zarur bo‘lgan patent va shaxsini tasdiqlovchi hujjatini yo‘qotib qo‘ygan. Shu bois ishga joylasha olmagan.
So‘nggi kunlarda u ijara uyiga to‘lov uchun puli yo‘qligi sababli ko‘chada qolgan. Bosh konsulxona diplomatlari fuqaroning yashash joyini aniqlab, O‘zbekistonga yetib olishi uchun zarur hujjatlarni rasmiylashtirishda yordam berdi.
Shuningdek, mamlakatga qaytishi uchun aviachipta olib berilgan.
Xorijdan O‘zbekistonga qaytarilayotgan shaxslar
Avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi.
O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
Rossiyadagi elchixonaning o‘zbekistonliklarga murojaati
O‘zbekistonning Rossiyadagi elchixonasi mamlakatda noqonuniy yurgan o‘zbekistonliklarni huquqiy maqomini zudlik bilan hal qilishga chaqirdi. 5-fevraldan boshlab Rossiya hududida Rossiya IIV tomonidan yuritiladigan “nazorat qilinadigan shaxslar reyestri” faoliyat ko‘rsatishni boshladi.
Izoh (0)