Rossiyada migrantlarga patent tizimini bekor qilish, uning o‘rniga ishlash uchun ruxsatnomani joriy qilish taklif etilmoqda. “Adolatli Rossiya — haqiqat uchun” partiyasi deputatlari mazkur qonun loyihasini muhokama qilishga taqdim etdi.
Unga ko‘ra, ishlash uchun ruxsatnomani olishda migrantlar suratga tushib, barmoq izlari bilan ro‘yxatdan o‘tishi shart bo‘ladi.
“Migrantlarni ishga jalb etish tizimi bo‘yicha taklif etilayotgan o‘zgartirishlar chet el fuqarolarining hududlar bo‘yicha taqsimlanishi ustidan nazoratni kuchaytirishga, budjet daromadlarini oshirishga hamda migrantlar va mamlakatimiz fuqarolarining ishga joylashish bo‘yicha sharoitlarini tenglashtirishga yordam beradi”, — deydi partiya yetakchisi Sergey Mironov.
Uning ta’kidlashicha, Rossiyada migratsiya oqimlarini nazorat qilish maqsadida 2015-yilda barcha migrantlar uchun majburiy tarzda patent tizimi joriy qilingan, ammo tekshiruv natijalari migrantlarda patentning bor-yo‘qligi ularning ishga joylashishida jiddiy ta’sir o‘tkazmayotganini ko‘rsatmoqda.
“Shu sababli biz samarasiz tizimni bekor qilishni taklif qilamiz”, — degan partiyasi yetakchisi.
Uning qayd etishicha, bugungi kunda patent narxi hududlarga qarab oyiga 2724 rubldan 10 929 rublgacha bo‘lib, bu mablag‘lar to‘liq budjetga o‘tkaziladi. Agar patent tizimi bekor qilinsa, barcha mehnat muhojirlari Rossiyaning fuqarolari uchun belgilangan daromad solig‘ini to‘liq miqdorda to‘lashlari shart bo‘ladi.
Izoh (0)