Kremlda Ukrainani qayta tiklashga yordam berish uchun Rossiyaning muzlatilgan aktivlarining katta qismidan voz kechishga rozilik berish haqida gap ketmoqda, deya xabar bermoqda Reuters agentligi uchta manbaga tayanib.
Shu bilan birga, Moskva bu mablag‘ning bir qismini Ukrainadagi harbiy mojaro paytida Rossiyaga qo‘shib olingan hududlarga sarflanishini talab qiladi, deydi agentlik manbalari.
Taklif Ukrainadagi mojaroning kelajakdagi yechimi doirasida muhokama qilinmoqda. Muzlatilgan aktivlar hajmi 300-350 milliard dollarga baholanmoqda, agentlik manbalariga ko‘ra, Rossiya Ukraina va uning yangi hududlarini tiklash uchun 300 milliard dollar o‘tkazib berishi mumkin.
Shu bilan birga, Jahon banki, BMT, Yevropa komissiyasi va Ukraina hukumati tomonidan o‘tgan yilgi hisob-kitoblarga ko‘ra, Ukraina iqtisodiyotini tiklash uchun 486 milliard dollar kerak bo‘ladi, Ukrainadagi uy-joy fondining 10 foizi vayron bo‘lgan yoki buzilgan. Kaxovka GESning vayron bo‘lishi natijasida atrof-muhit va qishloq xo‘jaligiga katta zarar yetkazildi. Eng ko‘p zarar ko‘rgan tarmoqlar uy-joy kommunal xo‘jaligi, transport, savdo, sanoat va qishloq xo‘jaligidir.
Ukraina bosh vaziri Denis Shmigalning aytishicha, mamlakatning tiklanishi uchun resurslarning asosiy manbai “G‘arbda muzlatilgan Rossiya aktivlarini musodara qilish bo‘lishi kerak”.
2024-yil may oyida Yevropa ittifoqi muzlatilgan aktivlardan tushgan daromadni sanksiyalar bekor qilinganidan keyin ham Rossiyaga o‘tkazmaslikka qaror qildi. Rossiyaning Yevropa ittifoqidagi missiyasi Yevropa ittifoqi kengashi qarorini “o‘g‘rilik” deb atadi.
Izoh (0)